Operatori i Sistemit, Transmisionit dhe Tregut të energjisë elektrike të Kosovës, ka arritur të nënshkruajë një marrëveshje të re dyvjeçare me Rrjetin Evropian të Operatorëve të Sistemit të Transmisionit për Energjinë Elektrike, ENTSO-E.
Lidhur me këtë marrëveshje, në emisionin “ DITARI” në Tëvë1, ka folur kryeshefi i KOSTT-it, Evetar Zeqiri, i cili e ka vlerësuar si një hap të rëndësishëm për KOSTT, pasi sipas tij tregon se i kanë përmbushur të gjitha kriteret teknike të parapara për të operuar në mënyrë të sigurtë.
Zeqiri, po ashtu ka treguar se Kosova nuk ka përgjegjësi të reja nga kjo marrëveshje, mirëpo ka thënë se kushtet janë më specifike dhe të avancuara në kuptimin e tolerimeve që lejohen.
“Vazhdimi i kësaj marrëveshje paraqet një hap të rëndësishëm për KOSTT, sepse i mundëson vazhdimin e operimit të sigurtë të territorit të saj në bllok me Shqipërinë dhe është një nga ngjarjet kryesore të KOSTT, për shkak se kjo marrëveshje tregon se KOSTT-i ka përmbushur të gjitha kriteret. Kosova i ka të njëjtat përgjegjësi, mirëpo kriteret apo kushtet janë më specifike dhe të avancuara në kuptimin e tolerimeve që lejohen. Këto kritere janë specifikuar në mënyrë më të detajuar në këtë marrëveshje, gjë që ka krijuar nevojën për KOSTT-in që të krijojë mekanizma të brendshme për të reaguar më shpejtë dhe për të siguruar që këto kritere asnjëherë nuk shkelen dhe nuk cenohet marrëveshja e kyçjes dhe operimi i sigurtë”, ka thënë Zeqiri.
I pyetur se a përfshihet rritja e çmimit të energjisë elektrike në marrëveshje, Zeqiri ka mohuar të ketë një kërkesë të tillë.
“Jo kërkesa për rritje të energjisë nuk është diçka që na tangon neve, pra nuk nuk kemi të bëjmë me këtë. Kërkesat tona drejtuar ZRRES-së janë kryesisht kërkesat që i adresojmë për njohjen e të hyrave për investime, pra tarifat e tona lejohen prej rregullatorit, mirëpo ne nuk jemi konsumues i energjisë në vetvete por ne mundësojmë transmetimin e energjisë në gjithë territorin e Kosovës”, ka shtuar ai.
Më tej, ai ka folur edhe për situatën me energjii elektrike në veri të vendit, për ku ka thënë se nuk kanë përgjegjësi për furnizim por që kanë përgjegjësi bashkëpunimi me të gjithë të licencuarit.
“Tashmë ne nuk kemi përgjegjësi për pjesën veriore, mirëpo ne kemi përgjegjësi dhe bashkëpunojmë ngushtë me të gjithë të licencuarit, përfshirë edhe elektorserverin i cili për të furnizuar konsumatorët e tij me energji përdor rrjetin tonë të transmetimit dhe i paguan tarifat të cilat janë të përcaktuara nga rregullatori”, ka thënë Zeqiri./teve1.info/
