Mark Carney, ish-bankier, do të bëhet kryeministri i ardhshëm i Kanadasë pasi Partia Liberale në pushtet e zgjodhi atë si liderin e saj të dielën.
Ai merr detyrën teksa Kanada po përballet me luftën tregtare të presidentit të Shteteve të Bashkuara, pas tarifave të vendosura ndaj saj dhe kërcënimin e aneksimit.
Carney do zëvendësojë kryeministrin Justin Trudeau, i cili njoftoi dorëheqjen e tij në janar por mbetet kryeministër derisa pasardhësi i tij të bëjë betimin në ditët në vijm. Ai fitoi me shumicë votash prej 85.9%.
“Ka dikush që po përpiqet të dobësojë ekonominë tonë,” tha Carney . “Donald Trump, siç e dimë, ka vendosur tarifa të pajustifikuara për atë që ndërtojmë, për atë që shesim dhe si sigurojmë jetesën. Ai po sulmon familjet, punëtorët dhe bizneset kanadeze dhe ne nuk mund ta lëmë të ketë sukses dhe nuk do ta bëjmë.”
Lufta tregtare e Trump dhe bisedat e tij për ta bërë Kanadanë shtetin e 51-të të SHBA-së kanë zemëruar kanadezët ku disa po anulojnë udhëtimet në jug të kufirit dhe shumë po shmangin blerjen e mallrave amerikane kur munden, raporton AP.
Rritja e nacionalizmit kanadez ka forcuar shanset e Partisë Liberale në zgjedhjet parlamentare që priten brenda ditëve ose javëve, dhe pozita e liberalëve është përmirësuar në mënyrë të qëndrueshme në sondazhet e opinionit.
