Një pretendim se trupat amerikane të KFOR-it do të largohen nga Kosova qarkulloi goxha në opinion javët e fundit.
Krejt ky narracion erdhi pas ardhjes së administratës së re në Shtëpinë e Bardhë, me në krye presidentin, Donald Trump.
Por diçka e tillë nuk pritet të ndodh sipas ministrit të Mbrojtjes, Ejup Maqedonci i cili për Tëvë1 thotë se me SHBA-të janë në koordinim të ngushtë për çdo vendim.
“Kjo nuk do të bëhet në asnjë mënyrë vetëm brenda një jave, një dite një afati të shkurtër kjo do të bëhet në koordinim, ne gjithë arritjet i kemi bërë bashkë me Shtetet e Bashkuara të Amerikës, kur në krye të SHBA-së kanë qenë edhe Partia Republikane por edhe Partia Demokratike është një qasje më afatgjate se sa që trumbetohet por të gjithë jemi dëshmitar të luftës speciale dhe dezinformatave që aktorët e jashtëm po bëjën jo vetëm në Ballkanin Perëndimor jo vetëm në Republikën e Kosovës por gjithandej për të krijuar ambient që të shtyjnë përpara interesat e tyre”, ka thënë Maqedonci për Tëvë1.
Maqedonci deklaroi se Shtetet e Bashkuara të Amerikës nuk marrin vendime ad-hoc ashtu siç po paraqitet në opinionin publik.
“Shtetet e Bashkuara të Amerikës nuk marrin vendime ad-hoc nuk marrin vendime çastit sot për nesër në Shtetet e Bashkuara të Amerikës ka struktura, ka organizime ka Agjencinë ka shtabe të përgjithshme të forcave të tyre të cilat paraprakisht bëjnë analiza dhe dërgojnë rekomandime te Presidenti dhe te departamenti i Mbrojtjes për çdo lëvizje vendosje apo tërheqje të forcave, kjo nuk bëhet në asnjë mënyrë në formatin se si është prezantuar”, thotë ai.
E krejt kjo sipas tij, po bëhet me ndikim nga akterë të jashtëm që qëllim kanë, destabilitetin në Kosovë dhe Ballkanin Perëndimor.
“Normalisht që akterët e jashtëm aktorët që synojnë destabilizimin e Ballkanit akterët që synojnë edhe destabilizimin e Evropës por edhe që synojnë që të kenë qasje kundër Shteteve të Bashkuara të Amerikës i fryjnë këto informata po mendoj i shpërndajnë më shumë, nxisin edhe i bëjnë që të duken më reale se sa në të vërtetë janë të tilla”, shprehet ministri i Mbrotjes.
Javë më parë, Aleanca Veriatlantike e NATO-së, mohoi se trupat amerikane do të largohen nga Kosova.
