Ministri i Mbrojtjes, Ejup Maqedonci, thotë se kanë raporte të veçanta me Shtetet e Bashkuara të Amerikës.
Maqedonci thotë se ShBA-ka është kyç në zhvillimin e kapaciteteve të Forcës së Sigurisë së Kosovës.
“Kemi raporte të veçanta me Shtetet e Bashkuara të Amerikës. ShBA kanë qenë dhe mbesin mbështetësit tonë kryesor si vend, veçanërisht në aspektin e mbrojtës dhe sigurisë, janë faktori kyç në zhvillimin e kapaciteteve tona. Ne kemi marrëveshje të ndryshme me SHBA, mes tyre kemi edhe një marrëveshja që quhet FMS, përmes të cilës ne kemi një kod buxhetor që bëjmë blerje direkte, të cilat prokurohen prej vetë shtetit amerikan dhe ato janë blerje ushtarake”, tha ai në emisionin “Info Nata” në Tëvë1.
Ministri i Mbrojtjes, tha se furnizuesit kryesor të FSK-së janë ShBA-ja dhe Turqia.
“Shumë sisteme që i blejmë ne prokurohen prej Departamentit të Mbrojtjes së Shteteve të Bashkuara të Amerikës dhe ne derdhim mjetet në kontot e tyre atje. Kemi edhe blerje direkte me prodhues amerikan, pra është furnizuesi kryesor, janë Shtetet e Bashkuara të pasuara me Turqinë dhe disa vende të tjera”, tregoi Maqedonci.
Përfund ai tha se Turqia vazhdon të jetë e gatshme për të mbështetur FSK në të gjitha aspektet.
“Turqia ka qenë një vend i gatshëm dhe vazhdon të jetë i gatshëm për të mbështetur zhvillimin e Forcës së Sigurisë së Kosovës në të gjitha aspektet, edhe në aspektin e trajnimeve, shkollime por mbi të gjitha në aspektin e furnizimit me sistemet të armatimit dhe pajisjet”, shtoi ai./teve1.info/
