Ministri në detyrë i Mbrojtjes, Ejup Maqedonci ka thënë se dërgimi i njësive të specializuara të zhytjes dhe kërkim shpëtimit të Forcës së Sigurisë së Kosovës sot në mbështetje të autoriteteve civile për kërkimin e trupit të mërgimtarit në liqenin e Ujmanit në Komunën e Zubin Potokut është bërë në bashkëpunim me institucionet e Kosovës dhe bashkërendim me KFOR-in.
Ai ka thënë se Forca e Sigurisë së Kosovës në kuadër të detyrave të saj thelbësore ka edhe mbështetjen e autoriteteve civile.
“Në këtë aspekt në bashkëpunim me Agjencinë e Menaxhimit të Emergjencave, Policinë e Kosovës dhe bashkërendim me KFOR, ekipet e specializuara të FSK kanë filluar operacionin e kërkimit në liqenin e Ujmanit me synimin që sa më shpejtë të nxirret trupi i mërgimtarit dhe ti lehtësohet dhimbja familjes”, ka shkruar Maqedonci.
FSK sot i është bashkuar operacionit për gjetjen e trupit të një personi i cili kishte kërcyer nga ura e Liqenit të Ujmanit dhe nuk ishte dal më.
Sipas marrëveshjes së vitit 2013 ndërmjet Kosovës dhe NATO-s, FSK nuk mund të shkojë në katër komunat veriore të banuara me shumicë serbe pa autorizim nga NATO./teve1.info/
FSK i bashkohet operacionit për kërkimin e trupit të mërgimtarit në Ujman
