Ministri i Mbrojtjes, Ejup Maqedonci, sot ka pritur në takim drejtorin e Komunikimit dhe Kibernetikës të Komandës së Forcave Amerikane për Evropë (J6 EUCOM), gjeneral major John Phillips.
Vizita e tij në Kosovë u realizua në kuadër të bashkëpunimit dypalësh ndërmjet Kosovës dhe ShBA-së, në fushën e sigurisë së informacioneve dhe komunikimit.
Sipas njoftimit të ministrisë, së shpejti pritet arritja e Marrëveshjes për Ndërveprimin dhe Sigurinë e Komunikimeve, marrëveshje kjo e cila është në fazën e fundit të dakordimit.
“Ministri Maqedonci falënderoi gjeneral major Phillips për mbështetjen e pakursyer që EUCOM ka ofruar në zhvillimin e kapaciteteve të Forcës së Sigurisë së Kosovës, veçanërisht në fushën e komunikimit dhe mbrojtjes kibernetike. Ministri theksoi se ky bashkëpunim do të vazhdojë të fuqizohet edhe më tej në të ardhmen, duke siguruar përparim dhe zhvillim të vazhdueshëm për Forcën e Sigurisë së Kosovës”, thuhet në njoftim./teve1.info/
