Ministri i Mbrojtjes, Ejup Maqedonci, ka pritur në takim pronarin e kompanisë Baykar, Hakul Bayraktar si dhe ambasadorin e Turqisë në Kosovë, Sabri Tunç Angili.
Maqedonci thotë se bashkëpunimi me kompaninë Baykar ka bërë që FSK për një kohë të shkurtër të rritë kapacitetet e saj luftarake.
“Bashkëpunimi me kompaninë Baykar që është kthyer në kryefjalën e teknologjisë ushtarake me prodhimet e veta, ka bërë që FSK për një periudhë të shkurtër të ngrisë kapacitetet e saj luftarake në nivelin që garanton mbrojtje territoriale dhe siguri për të gjithë qytetarët tanë”, ka shkruar ministri i Mbrojtjes në Facebook.
Ndërkohë, gjatë këtij takimi është diskutuar edhe për projektet e radhës, ku është bërë e ditur që do të ketë investime dhe zgjerim të bashkëpunimit përtej blerjeve.
“Gjatë këtij takimi diskutuam për projektet e rradhës në të cilat do të investojmë, dhe zgjerimin e këtij bashkëpunimi përtej blerjeve”.
Ministri ka falënderuar mysafirët për vullnetin e gatishmërinë që kjo kompani dhe Turqia kanë shfaqur bashkëpunim me Ministrinë e Mbrojtjes dhe Qeverinë e Kosovës.
“Për vullnetin e gatishmërinë që kjo kompani dhe Republika e Turqisë ka shfaqur për bashkëpunim me Ministrinë e Mbrojtjes dhe Qeverinë e Republikës së Kosovës, shpreha mirënjohjen time të thellë duke dekoruar me medalje për “Shërbim të Shquar” z. Haluk Bayraktar”.
Maqedonci ka shkruar se lidhja e fuqishme ndërmjet Kosovës dhe Turqisë do të vazhdojë./teve1.info/
