Ministri në detyrë i Mbrojtjes, Ejup Maqedonci, është nderuar me një prej çmimeve më prestigjioze në fushën ushtarake, duke u përfshirë në Sallën e Famës (Hall of Fame) të Kolegjit të Luftës të Ushtrisë së Shteteve të Bashkuara (US Army War College).
Në ceremoninë zyrtare ka qenë i pranishëm edhe Gjenerali Randy A. George, Shef i Stafit të Ushtrisë Amerikane.
Maqedonci ka shprehur mirënjohje për këtë vlerësim, duke e cilësuar si një nder jetësor dhe një reflektim të përkushtimit dhe profesionalizmit të gjithë atyre me të cilët ka bashkëpunuar gjatë karrierës së tij.
“Ky vlerësim nuk është vetëm arritje personale, por një pasqyrim i përpjekjeve të përbashkëta dhe i vlerave të shërbimit e udhëheqjes që na bashkojnë në misionin tonë”, ka theksuar Maqedonci në një postim në Facebook.
Ai gjithashtu falënderoi Kolegjin e Luftës të SHBA-së për mundësinë që vite më parë i ofroi për të përfunduar studimet në këtë akademi.
Ky nderim, tha Maqedonci, e forcon bindjen e tij në fuqinë e shërbimit, udhëheqjes dhe mësimit të përjetshëm – vlera që, sipas tij, “kapërcejnë kufijtë dhe bashkojnë të gjithë ata që i shërbejnë vendit dhe komunitetit të tyre”.
