Ministri në detyrë i Mbrojtës, Ejup Maqedonci ka thënë se ndryshimi i ligjeve që mundësoi krijimin e Ushtrisë dhe Ministrisë së Mbrojtjes, hapi rrugë për forcimin e mbrojtjes e cila siç ka thënë ai kulmoi me investime rreth 430 milionë euro gjatë qeverisjes 5 vjeçare.
Në një postim në Facebook në 7 vjetorin e ndryshimit të ligjeve për FSK-në, Maqedonci ka thënë se Kosova dhe rajoni janë më të sigurta kur ushtria e Kosovës është e fuqishme.
“Sot shënojmë 7 vjetorin e ndryshimit të ligjeve që mundësuan krijimin e Ushtrisë dhe Ministrisë së Mbrojtjes të Kosovës. Ky proces, me konsensus të gjerë, krijoi bazën ligjore për forcimin e mbrojtjes sonë dhe kulmoi me investime rreth 430 milionë euro gjatë 5 viteve të qeverisjes sonë. Kosova dhe rajoni janë më të sigurt kur ushtria jonë është e fuqishme, prandaj do të vazhdojmë investimet në mbrojtje dhe siguri”, ka shkruar ai./teve1.info/
