Ministri në detyrë i Mbrojtjes, Ejup Maqedonci, ka theksuar se sfidat kryesore digjitale në fushën e mbrojtjes përfshijnë rritjen e përdorimit të inteligjencës artificiale, si dhe rreziqet nga dezinformimi dhe ndërhyrjet keqdashëse të jashtme.
Këtë deklaratë ai e bëri gjatë ditës së dytë të Forumit të Sigurisë në Varshavë, në panelin me titull “Të lidhur, por të mbrojtur: Shtylla digjitale e demokracisë moderne”.
Në këtë panel morën pjesë edhe ministra dhe zëvendësministra nga Polonia, Danimarka, Ukraina, Shqipëria dhe përfaqësues nga Ministria e Forcave të Armatosura të Francës.
“Ministri Maqedonci theksoi rëndësinë e mbrojtjes gjithëpërfshirëse në fushën ushtarake dhe përfshirjen aktive të qytetarëve në këtë proces. Ai përmendi si sfidë kryesore rritjen e përdorimit të inteligjencës artificiale dhe rreziqet nga dezinformimi dhe ndërhyrjet e jashtme keqdashëse”, thuhet në postimin e Maqedoncit.
Ndërsa, panelistët theksuan se ndonëse shtetet evropiane ndjekin qasje të ndryshme ndaj këtyre sfidave, bashkëpunimi dhe shkëmbimi i përvojave mbeten të domosdoshme për të garantuar sigurinë dhe mbrojtjen në fushën digjitale./teve1.info/
