Ministri i Mbrojtjes, Ejup Maqedonci ka pritur sot në takim bilateral ministrin e mbrojtjes të Sllovenisë, Marjan Sarec.
Maqedonci tha se gjatë takimit diskutuan rreth situatës së sigurisë në vend por dhe më gjerë.
Tutje ministri ka theksuar se sulmi i 24 shtatorit është shqetësues për faktin se siç tha ai, prapa tij qëndrojnë strukturat shtetërore të Serbisë, andaj Maqedonci tha se duhet trajtuar me shumë vëmendje si veprim që tregon hapur tendecën për destabilizimin e vendit, rrjedhimisht të Ballkanit Perëndimor.
“Krahas situatës së sigurisë ministrin Sarec e njoftova për të gjitha përparimet e FSK-së gjerë më tani, për kapacitetet dhe vullnetin tonë për të thelluar bashkëpunimin me forcat sllovene përmes trajnimeve dhe misioneve të përbashkëta, si dhe aktiviteteve të tjera ushtarake që mund t’i zhvillojmë përtej planit bilateral. Shpreha qëndrimin e Kosovës sa i përket luftës në Ukrainë dhe synimin e qartë që kemi si shtet për anëtarësim në BE, A5 dhe në NATO”, tha Maqedonci.
Derisa nga Sarec ka kërkuar mbështetjen e Sllovenisë në rrugëtimin e Kosovës për anëtarësim në organizatat euro-atlantike, për të cilin objektiv ministri garantoi mbështetjen e padiskutueshme të shtetit slloven.
“E kaluara e përbashkët dhe qëndrimi pro vlerave perëndimore janë lidhja e pashkëputshme ndërmjet dy shteteve tona”, tha tutje ai./teve1.info./
