Zëdhënësi i Qeverisë, Arlind Manxhuka, i është kundërpërgjigjur PDK-së pasi kjo parti deklaroi se kishte qenë e gatshme për një marrëveshje të gjerë politike, madje edhe për një marrëveshje të kufizuar vetëm për zgjedhjen e presidentit, por sipas tyre VV e kishte refuzuar.
Manxhuka tha se kryeministri Kurti e kishte ftuar në takim kryetarin e PDK-së, Bedri Hamza, dhe se gjatë këtyre kontakteve Hamza nuk kishte shprehur kundërshtim ndaj Glauk Konjufca si person, të cilin VV e kishte propozuar për president.
Ai shtoi se kandidatura e Konjufcës ishte bërë në fund të afatit, në pritje të arritjes së një marrëveshjeje të mundshme me partitë opozitare.
Manxhuka theksoi gjithashtu se në vitet 2011 dhe 2016, VV kishte pasur kundërshtime ndaj emrave të kandidatëve që u zgjodhën presidentë në atë kohë, por sipas tij nuk kishte pasur takime me ta.
“Si LVV në vitet 2011 dhe 2016 kemi pasur problem me emrat e përveçëm të atyre që u bënë presidentë asokohe. Dhe në vend të takimeve me neve, pushteti atëbotë na përndiqte e shtypte me polici. Bedri Hamzën e ftoi KM Kurti dy herë në takim dhe kanë komunikim normal e të mirë. Hamza asnjëherë s’ia ka thënë Kurtit që ka naj problem me Glauk Konjufcën si personalitet, e të cilin LVV e kandidoi krejt n’fund të afatit për president në pritje të ndonjë marrëveshje me opozitën”, ka shkruar Manxhuka.
Ndërkohë, shefi i Grupit Parlamentar të PDK-së, Arian Tahiri, deklaroi të shtunën në një konferencë për media se sipas tij çështja nuk qëndron te emri i presidentit, por te synimi i VV-së për të kontrolluar të gjitha institucionet.
Ai shtoi se në mungesë të votave të nevojshme, VV duhej të kërkonte marrëveshje dhe konsensus me opozitën.
Sipas Tahirit, një marrëveshje e tillë ishte refuzuar nga VV, e cila kishte insistuar vetëm në kandidatë partiakë./teve1.info/
