Profesionin e mjekut nuk e braktisën as në kohën e luftës. Hafir Shala e Lec Gradica, ishin nga mjekët e parë që në luftën e fundit në Kosovë, vullnetarisht iu dolën në ndihmë ushtarëve të plagosur të UÇK-së dhe popullatës civile. Kronika në vazhdim flet për sakrificat e këtyre mjekëve dhe sa është numrin e personelit mjekësor që u vra nga forcat serbe në Kosovë.
Shtatorja e tij zë vendin qendror në dhomë.
Por, Hafir Shala, i mungon familjes tash e 25 vjet.
Me 10 prill të vitit 1998, vetura më të cilën po udhëtonte nga Drenasi për në Prishtinë, u ndal në këtë vend nga policia serbe. Mantelbardhët shqiptarë të vrarë nga forcat serbe
E nga ai moment nuk dihet gjë për fatin e mjekut të luftës.
Por, emrat e atyre që kanë gisht në zhdukjen e kryefamiljarit të tyre, i dinë mirë në familjen Shala.
“Dyshohet që ka qenë Fadil Syleviq së bashku me Sllavisha Filliq. Pastaj pasi që u ndalua nga shërbimi sekret serb, është dërguar në stacionin policor numër 1 në Prishtinë, ku sipas dy dëshmitarëve që kanë qenë më të, Shaban Neziri dhe Hetem Sinani, babi ka përjetuar tortura të rënda, saqë zëri i tij është dëgjuar edhe jashtë stacionit policor”, tha Gentrit Shala, djali i mjekut të luftës, Hafir Shala.
I biri i Hafir Shalës, Gentriti, thotë se atë të premte, babai i tij u paralajmërua të mos udhëtonte për në Prishtinë.
Ndërsa për Tëvë1, ka zbuluar se çka e shtyri të marrë atë rrugë, pavarësisht rrezikut.
“Një ditë më herët, babai ka qenë me Fehmi Lladrovcin dhe disa bashkëluftëtar të tjerë, të cilët ja kanë tërheq vërejtjen që të mos niset për Prishtinë. Fehmi Lladrovci i ka thënë të mos niset për Prishtinë, por babai ia ka kthye që nuk mund të niset lufta pa e pas gati sallën e operacionit”, u shpreh Gentriti.
E odën e vjetër të familjes në fshatin Gradicë, e viziton shpesh Besnik Leci.
Këtu 25 vjet më parë, babai i tij, Lec Leci i njohur si Lec Gradica, themeloi spitalin e parë ushtarak të Brigadës 114.
“Në pranverën e vitit 1998, kur lufta mori hov është dashur një mobilizim i gjithëmbarshëm për këtë arsye babi erdhi në vendlindje dhe në odën e gjyshit e improvizon spitalin ushtarak të Gradicës ai së bashku me mamin, u vu në gatishmëri të UCK-së dhe popullatës”, u shpreh Besnik Leci, djali i mjekut të luftës, Lec Lecit.
Emrat e Hafir Shalës dhe Lec Gradicës, janë në mesin e shumë mjekëve, që u vranë nga forcat serbe në luftën e fundit në Kosovë.
E emrat e tyre, janë përmbledhur në këtë libër të ish-kirurgut, Salih Krasniqi.
“Kam të dhënë se janë të vrarë 19 mjekë, 14 infermierë, 8 studentë të mjekësisë dhe tre ndihmës mjekëve në shtëpitë e shëndeteve në krejt Kosovën”, tha Salih Krasniqi, ish-kirurg në QKUK.
Ndryshe, Prokuroria Speciale e Republikës së Kosovës ka ngritur një aktakuzë kundër Sllavisha Filiq, i cili në cilësinë e pjesëtarit të Sigurimit Shtetëror të Serbisë ngarkohet për zhdukjen e mjekut Hafir Shala.
Ndërsa për kapjen e tij, ndihmë ka kërkuar edhe Policia e Kosovës.
