Autore: Adea Mustafaj
Janë bërë një javë që kur për shumë lagje të Prishtinës që furnizohen nga liqeni i Badocit, uji i pijshëm është ndaluar.
Kjo pasi në ujë janë vërejtur vlerat të shtuara të manganit.
E për qytetarë kjo situatë është bërë problematike.
“Jo, unë e kom edhe filterin po nuk mundem me pi as prej filterit. Jo tash, lajmrojnë ndërkohë, heket prap vnohet, spo di del prej ujit pobet spo dim as na” , shprehet Lutfie Ibrahimi.
“Valla po kushton, se ki njeri që tre litra ujë i pinë. E boll problem është kjo. Kush po jeton me një penzi 120 euro. Ku me gjetë pare. Duhet me pagu rrymen, ujin senet”, thotë Faruk Abrahami.
Nga Kompania Rajonale e Ujësjellësit “Prishtina”, thonë se e kanë zvogëluar sasië e prodhimit të ujit, në mënyrë që të ruhet cilësia.
“Kohën e fundit, për shkak të rritjes së përqendrimit të manganit në liqenin e Badocit, është çrregulluar edhe furnizimi me ujë të pijshëm në ato zona, pasi që e kemi zvogëluar prodhimin e ujit që ta ruajmë cilesinë, si rekomandim nga IKSHPK. Po ashtu gjendja te banesat e Standardit kemi informacion që është stabilizuar. Ata furnizohen me ujë nga rezervuari Mirdita 1, dhe në moment që bie niveli i rezervuarit për shkak të harxhimeve, pompat automatikisht ndërpriten gjatë natës, derisa te akumulohet ujë në rezervuar për të pasur ujë diten”, ka thënë zëdhënsja Arjeta Mjeku.
E kryetari i Prishtinës, Përparim Rama, tha për Tëvë1 se edhe pse KRU “Prishtina” nuk është në menaxhim të komunës, ata do t’ju bëjnë presion që të jepet një zgjidhje.
“KRU Prishtina është na menaxhim të kompanisë regjionale që nuk është varëse e Komunës së Prishtinës. Pra nuk jemi ne në menaxhim të drejtpërdrejt, por sa e di unë, ata i kanë njoftu qytetarët se si dhe çka me bo me ujin për me bo të pishëm…. Po edhe ne do të bëjmë presion që sa më parë KRU “Prishtina” ta zgjedh këtë problem përkundër faktit që po themë që nuk është në menaxhim tonin”, tha Rama.
Televizoni ka tentuar të marr një përgjigje edhe nga Instituti Kombëtar i Shëndetësisë Publike të Kosovës, por të njejtit nuk janë përgjigjur.
