Kombëtarja e Shqipërisë nuk e ka marrë aspak një lajm të mirë në lidhje me sulmuesin Rey Manaj.
Bëhet e ditur se Manaj e ka mbyllur vitin 2024 dhe nuk do të jetë në dispozicion të Shqipërisë as për ndeshjet e nëntorit për shkak të lëndimit.
Manaj, po ashtu, nuk është ftuar nga Sylvinho as për duelet e këtij muaji për shkak të lëndimit që e pësoi para tri javësh në fitoren e Sivassporit ndaj Gaziantepit.
Trajneri i ekipit turk, Bylent Ujgun ka bërë të ditur se Manaj do të qëndroj jashtë fushës për disa javë.
“Rei Manaj nuk do të jetë me ne për një kohë të gjatë për shkak të dëmtimit që ka pësuar”, është shprehur Ujgun.
Mungesa e Manajt te Shqipëria edhe muajin e ardhshëm mund të sjell telashe për trajnerin Sylvinho në repartin e sulmit, duke pasur parasysh se edhe Armando Broja ende nuk është i gatshëm për lojë.
27-vjeçari Manaj këtë sezon ka shënuar 1 gol në 5 paraqitje për Sivassporin në Superligën e Turqisë.