Politologu, Albinot Maloku vlerëson se në asnjë mënyrë nuk duhet të krijohet anti-fushatë ndaj Policisë së Kosovës, por megjithatë ka theksuar se të metat e këtij institucioni duhet të tregohen.
Maloku ka deklaruar se sot në Kosovë, për vetëm tre muaj përgatitje mund të bëhesh zyrtar policor, çka, sipas tij, nuk është aspak e shëndetshme dhe po i kushton shumë vendit.
Në emisionin “Këndi i Debatit” në Tëvë1, ai ka shtuar se me tre muaj trajnime nuk mund të bëhesh as rojtar ose truprojë i mirë, e jo më zyrtar policor.
“Nuk duhet në asnjë mënyrë të krijohet anti-fushatë ndaj Policisë, por në emër të moskrijimit të kësaj fushate unë konsideroj që do të duhej t’i hynin çështjeve siç duhet dhe me u gjet të metat e me u tregu të metat e Policisë së Kosovës për arsye se në momentin që tregohen këto të meta unë konsideroj që konvertohet një situatë tjetër bëhet një profesionalizëm më i madh. Sot në Republikën e Kosovës me 3 muaj ditë bëhesh polic dhe kjo nuk është aspak e shëndetshme sidomos tani kur kemi 18 vjet shtet. Unë konsideroj që tani do të ishte mirë me iu dediku energji në aspektin akademik të përgatitjes së këtyre policëve, pra pse mos të ketë shkollë të mesme të Policisë? Në kuadër të atij katërvjeçari unë jam i bindur se do të nxirrnim edhe policë profesional, edhe policë që e njohin edhe psikologjinë edhe mentalitetin dhe që e kanë përgatitjen e mirë siç do të duhej ta kishin. Unë konsideroj që as truprojë, as rojtar, as çfarëdo qoftë i një institucioni të caktuar nuk mund të bëhesh e përgatitesh mirë me 3 muaj. Pra, konsideroj që me 3 muaj polic po na kushton shumë për arsye se duke e parë një mekanizëm një institucion siç është Policia e Kosovës që e ka pasur respektin maksimal me situate specifike po krijohet njëfarë lloj averzioni..”, ka thënë Maloku.
