Njohësi i rrethanave politike, Albinot Maloku ka cilësuar se Procesi i Brdo Brijuni i mbajtur sot në Maqedoni të Veriut ka qenë vetëm shkëmbim mendimesh.
Kjo pasi sipas Malokut, në këtë proces nuk janë diskutuar temat që janë penguese drejtë integrimeve evropiane.
“Konsideroj që të gjitha këto vende mund të takohen për çdo ditë me lloj lloj emrash të forumeve ose proceseve ose të ngjashme, mirëpo thelbësisht asnjëra nuk ka vullnetin e sinqertë për të përballë me tema të nxehta dhe kemi situatën ku e hupin kuptimin, e hupin vlerën. Procese si të tilla veç ngelin në mesazhe dhe në vullnete, mirëpo në praktikë seç nuk duket asgjë dhe ky procesi i Brdo Brijunit në qoftë se procese tjera përcjellëse që janë shumë më kryesore, po kanë sfidat e veta nga ky takim, nga ky forum, mund të themi se është vetëm takim, shkëmbim mendimesh, ruajtje maksimale duke respektuar edhe mos prezencën e simboleve siç ndodh në këtë proces zakonisht”, tha Maloku në emisionin “Ditari” në Tëvë1.
“Dhe temat të cilat janë të rëndësisë parësore nuk është që diskutohen dhe kjo ja hup vlerën edhe procesit si të tillë. Në këtë proces nuk janë diskutu temat që janë penguese drejtë integrimeve evropiane”, shtoi ai
Ndryshe, presidentja e Kosovës, Vjosa Osmani, ka thënë se takimi i liderëve të rajonit në kuadër të procesit të Procesit Brdo-Brijuni, ka qenë më konstruktive i mbajtur ndonjëherë.
Ajo pas takimit të së hënës i mbajtur në Maqedoninë Veriore, ka thënë se të gjitha shtetet janë pajtuar për temat e propozuara ku ka dominuar ajo e integrimit evropian.
Osmani tha se ka pasur pajtim edhe për gjuhën e deklaratës për të cilin siç tha ajo, kanë bërë një kompromis.
Takimi i Brdo-Brijuni është ngjarje vjetore multilaterale në të cilën takohen presidentët e gjashtë shteteve të Ballkanit Perëndimor si dhe të Sllovenisë dhe Kroacisë, e ku fokusi kryesor është në procesin e zgjerimit të Bashkimit Evropian dhe anëtarësimin e rajonit në BE./teve1.info/
