Analisti politik Albinot Maloku, në emisionin “Këndi i Debatit” në televizionin Tëvë1, ka komentuar vendimin e shpallur sot nga Gjykata Kushtetuese të Kosovës lidhur me zgjedhjen e nënkryetarit të Kuvendit.
“Gjykata Kushtetuese me këtë aktgjykim paralajmërues dha vetëm një shpjegim të shkurtër, një konstatim të gjendjes aktuale në të cilën ndodhet vendi ynë,” tha Maloku. “Shpresojmë fuqishëm që në aktgjykimin përfundimtar të ketë sqarime të mëtejshme që do t’u japin përgjigje të gjithë atyre që nuk kanë qenë të sqaruar më parë, si për gjendjen aktuale, ashtu edhe për mënyrën e zgjedhjes së nënkryetarit të Kuvendit të Kosovës.”
Ai theksoi se situata politike në vend karakterizohet nga mungesa e kompromisit ndërmjet partive politike, dhe se kjo ka ndikuar në trajtimin e çështjes nga Gjykata Kushtetuese.
“Në këtë kohë të ndërlikuar politike, ne kemi një problem thelbësor me mosmarrëveshjet dhe mungesën e kompromisit mes partive. Gjykata Kushtetuese u mundua maksimalisht të qëndrojë në një nivel shpjegues, duke u fokusuar vetëm në aspektet juridike të çështjes,” shtoi Maloku.
Megjithatë, ai shprehu një kritikë ndaj institucioneve gjyqësore.
“Unë kam edhe një kritikë për Gjykatën Kushtetuese, sepse nuk po arrin ta zgjerojë më shumë përgjigjen e saj, në mënyrë që të ndihmojë jo vetëm me një shpjegim juridik, por edhe me një drejtim më të qartë për procesin politik, që po kalon nëpër vështirësi të mëdha.”
Duke përmbyllur, Maloku nënvizoi se vendimi për momentin është vetëm një konstatim i situatës.
“Ne kemi vetëm një konstatim të gjendjes aktuale, ku Kuvendi i Republikës së Kosovës konsiderohet i konstituar dhe të gjithë nënkryetarët janë zyrtarisht të zgjedhur dhe në detyrë.”
