Albinot Maloku, analist politik, ka folur për ofrimin e dorëheqjes nga kryetari i Lidhjes Demokratike të Kosovës (LDK), Lumir Abdixhiku, gjatë emisionit “Info Nata” në TëVë1.
Maloku ka vlerësuar se mënyra se si po ofrohet dorëheqja nga Abdixhiku nuk është e shëndetshme politikisht dhe se ajo duhet të jepet personalisht, jo të dorëzohet tek organet e partisë.
“Ka kohë që LDK-ja po e ka problem me ndjekjen e një pozicioni të qartë dhe të sqaruar. Ofrimi i dorëheqjes është tentim për t’i shpjeguar partisë dhe Kuvendit të saj. Keqja është se ai vetë nuk po e bën këtë në mënyrë të pakundërshtueshme, dhe nuk po kërkon një modalitet të qartë brenda burokracisë”, ka thënë Maloku.
Ai ka shtuar se procesi i dorëzimit të dorëheqjes përmes Kryesisë nuk është metoda më e mirë.
“Është interesant se si tentohet, përmes rrugëve indirekte, të tregojë se dorëheqja është vullnetare, mirëpo ajo pritet apo pranohet nga parti. Sipas mendimit tim, do të ishte më mirë që ai vetë të jepte dorëheqjen. Kjo metodë, që e afron tek Kuvendi dhe Kryesia, për mua nuk është e shëndetshme politikisht”, ka përfunduar Maloku.
