Qëndrim Kida më nuk është trajner i skuadrës së Malishevës.
Ekipi nga Superliga e Kosovës në futboll, ka bërë të ditur se ka ndarë rrugët me Kidën, të cilit i ka dëshiruar suksese në të ardhmen.
Në fakt, në njoftimin e Malishevës thuhet se trajnerit Kida i ka skaduar kontrata dhe tashmë janë në kërkim të një timonieri të ri.
Nën drejtimin e Kidës, skuadra e Malishevës arriti suksese të jashtëzakonshme.
Sezonin e fundit, përfundoi e katërta në Superligë kurse këtë sezon për herë të parë debutoi në garat evropiane.
U paraqit në rrethin e parë kualifikues të Ligës së Konferencës, por u eliminua nga Buduqnosti i Podgoricës me rezultatin e përgjithshëm 3:1.
Kandidatë potencial për ta zëvendësuar Kidën në krye të Malishevës, po përmenden Bekim Isufi dhe Arbnor Morina.
