I ftuar në emisionin “Respublika” në Tëvë 1, ai shton se ky vendim mund të jetë edhe i papranueshëm dhe i papërballueshëm për Kosovën.
Krejt këto deklarata të tij, analisti i ka mbështetur në pushtimin rus që po ndodhë në Ukrainë.
“Mirëpo mendoj që ekziston një hapësirë gjatë viteve të ardhshme sepse është e vërtetë se çmimi i njohjes nga Serbia është shumë i lartë, mund të jetë edhe i papranueshëm dhe i papërballueshëm për Kosovën. Kontekstin të cilin e ka kriju lufta në Ukrainë është se e ka zhvlerësu rolin e Rusisë dhe Kombeve të Bashkuara sepse edhe po të na njohë Serbia në këtë moment ne nuk jemi të sigurt që fitojmë ulëse sepse Rusia ka pazarin dhe interesin e vet në këtë dimension. Kjo e ka zhvlerësu në këtë moment edhe njohjen e drejtpërdrejt të Serbisë dhe në këtë kontekst edhe e ka ulë çfarëdo lloj pazari se çka mund të kërkojë Serbia”, tha Maliqi.
Sipas tij, nëse Serbia ofron “njohjen e tërthortë” duke i lejuar Kosovës anëtarësim në mekanizma ndërkombëtarë – atëherë kjo duhet shfrytëzuar mirë për të marrë njohjen e shtatë vendeve anëtare të NATO-s dhe Bashkimit Evropian.
“Kështu që formula e asaj që është përmendur edhe më herët, e njohjes së tërthortë ku Serbia nuk na njeh drejtpërdrejt por na lejon qasjen në sistemin ndërkombëtar, anëtarësimin dhe mund të jetë çelësi kryesor në këtë moment dhe Kosova duhet ta shfrytëzojë sepse edhe ulë peshën e asaj se çka Serbia mund të kërkojë dhe këtu rol vendimtar do të kenë këto shtatë vendet anëtare të NATO-s dhe BE-së që nuk na njohin të cilat kanë shprehur gatishmëri që ta njohin Kosovën pa marrë parasysh se cila është marrëveshja mes Kosovës dhe Serbisë”, shtoi ai.
Madje, Maliqi thotë se me “njohjen e tërthortë” nga Serbia, Kosova mund të anëtarësohet në NATO brenda katër apo pesë vitesh.
“Pra edhe nëse Serbia nuk na njeh, një marrëveshje gjithëpërfshirëse normalizimi e natyrës që e thashë e njohjes së tërthortë, do t’ia hapte derën Kosovës që të na njohin këto shtete dhe ta hapim rrugën për anëtarësim në NATO brenda 4-5 vitesh dhe ta konsolidojmë shtetësinë brenda arkitekturës evropiane”, tha ai./teve1.info/
