Momçilo Vukotiç dhe Zhika Vuksanoviq, në muajin shtator u arrestuan nga policia malazeze. Ekstradimin në Kosovë të dy serbëve të dyshuar për krime lufte e pengoi ish-ministri i Drejtësisë, Marko Kovaq. Arsyetimi i ish-ministrit po quhet qesharak nga njohësit të çështjeve politike në Mal të Zi, ndërsa Ministria e Drejtësisë në Kosovë thotë se nuk do të rri duarkryq.
Në fund të muajit shtator, dy shtetas serbë u ndaluan nga policia malazeze.
Kjo pasi mbi Momçilo Vukotiç dhe Zhika Vuksanoviq, rezultoi se kishte një flet-arrest ndërkombëtar.
Të dy këta dyshohet se kanë kryer krime të luftës në Kosovë.
Vetëm pak kohë më pas, gjykata malazeze nxori vendimin se Vukotiç dhe Vuksanoviq, duhet t’u dorëzohen autoriteteve të Kosovës.
Por, ekstradimin e tyre e pengoi, ish-ministri i drejtësisë, Marko Kovaq.
E arsyetimin e ish-ministrit, njohësit e çështjeve politike në Mal të Zi, po e quajnë qesharak.
“Shpjegimi i Ministrisë së Drejtësisë ishte shumë qesharak se gjoja ka dyshime për persekutim politik dhe shkelje të konventës evropiane për të drejtat e njeriut, kur dihet këtë kërkesë e ka bërë Interpoli dhe dihet që kjo kërkesë është në harmoni me këto konventa. 1:10 Dihet që Mali i Zi, edhe pse në shikim të parë duket që ka bashkëpunuar megjithatë ka bërë shumë eskalime duke dashur që kriminelet e luftës mos të ekstradohen sidomos në Kosovë”, tha Ali Salaj, analist politik nga Mali i Zi.
E ky vendim, sipas njohësit tjetër të çështjeve politike në shtetin malazez, Ismet Kallaba, mund të ndikojë në marrëdhëniet mes dy shteteve.
“Mendoj që edhe Kosova mund ta bej të njëjtën gjë, sigurisht kjo nuk është diçka e mirë, sepse vë në pikëpyetje edhe marrëveshjet e nënshkruara. Ju e dini qe kemi një marrëveshje të mirëkuptimin të firmosur nga Mali dhe Administrata e UNMIK-ut, atëherë vihet në pikëpyetje për çfarë ekziston kjo marrëveshje dhe cila është vlera e tyre?”, tha Ismet Kallaba, analist politik nga Mali i Zi.
E të motivuar politikisht arsyetimin e ish-ministrit të Drejtësisë, po e cilësojnë njohësit e çështjeve juridike në Kosovë.
“Në këtë rast mendoj se gjykatat e kanë kryer punën e vet me profesionalizëm të lartë dhe me etikë ndërsa ajo që ka dështuar është Ministria e Drejtësisë, ndonëse ligji ja njeh kompetencën që MD të vendos e fundit për ekstradim, prapë se prapë mendoj që vendimi i ish-ministrit ka qenë i motivuar politikisht dhe nuk ka pasur bazë ligjore për të mos ekstraduar dy shtetasit e kërkuar nga Kosova për krime lufte. Konsideroj që arsyet të cilat janë dhënë nga ish-ministri i Drejtësisë janë shumë të paqëndrueshme dhe pajustifikueshme”, tha avokati, Arbër Jashari.
Të dy serbët e dyshuar për krime lufte në Kosovë u lanë të lirë në Mal të Zi.
Ndërsa duarkryq për këtë thonë se nuk do të rrinë autoritetet kosovare.
“Vlen të ceket se ish ministri i ka marr këto vendime në ditët e fundit të mandatit të tij, me të cilat vendime nga deklarimet publike të Qeverisë së re të Malit të Zi, të njëjtit nuk pajtohen dhe presim reflektim nga ana e tyre. Prandaj, Ministria e Drejtësisë e Republikës së Kosovës nuk pajtohet me këtë vendim dhe do të ndërmarr të gjitha veprimet e nevojshme për këtë rast”, kanë deklaruar nga Ministria e Drejtësisë.
Nga Ministria e Drejtësisë për Tëvë1, po ashtu kanë thënë se për rastin e Vuksanoviç, e ka pranuar vendimin përmes Interpolit, ndërsa ende është në pritje të vendimit përmes Ministrisë së Drejtësisë të Malit të Zi.
