Kryeministri i Malajzisë Anwar Ibrahim njoftoi të mërkurën se Kuala Lumpur do të ndërtojë një shkollë, spital dhe xhami në Gaza, e cila është shkatërruar nga lufta e Izraelit që nga tetori i vitit 2023, njofton AA.
Deklarata e Anwar vjen ndërsa armëpushimi në enklavën e rrethuar vazhdon në javën e dytë që nga 19 janari.
“Njoftimi i një armëpushimi në Gaza pas një masakre brutale që mori më shumë se 46,000 jetë dhe zhvendosi më shumë se dy milionë palestinezë duhet të mirëpritet me një plan për rimëkëmbjen e Gazës”, tha Anwar në X.
“Malajzia do të mobilizojë përpjekjet për të ndërtuar një shkollë, spital dhe xhami në Gaza për të ndihmuar në zbutjen e vuajtjeve të duruara nga popullata palestineze,” shtoi ai.
Marrëveshja e armëpushimit hyri në fuqi në Gaza më 19 janar, duke pezulluar luftën e Izraelit që ka vrarë më shumë se 47,300 palestinezë, shumica prej tyre gra dhe fëmijë, dhe ka plagosur më shumë se 111,000 që nga 7 tetori 2023.
Sulmi izraelit ka lënë më shumë se 11,000 njerëz të zhdukur, me shkatërrim të gjerë dhe një krizë humanitare që ka marrë jetën e shumë të moshuarve dhe fëmijëve në një nga fatkeqësitë më të këqija humanitare globale.
