Për më shumë se dy javë koalicioni fitues zgjedhor i Francës nuk po bie dakord për emrin e kryeministrit të tij.
Ndërkohë presidenti i Francës Emmanuel Macron njoftoi se nuk do ta emërojë Qeverinë e re deri pas përfundimit të Lojërave Olimpike të Parisit.
Sipas Macronit formimi i Qeverisë në këtë kohë do të krijonte parregullsi.
“Dëshira ime është që sa më shpejt të mund të formoj një qeveri sepse kombi ka nevojë për një qeveri që të marrë vendime, të përgatisë një buxhet, të marrë vendime për vendin, por deri në mes të gushtit duhet të jemi të fokusuar në Lojërat Olimpike”, ka thënë Macron.
Deklaratat e Macron vijnë pasi Fronti i Ri Popullor, një koalicion i krahut të majtë që përbën grupin më të madh në Parlamentin francez,propozoi zyrtaren pak të njohur, Lucie Castets, si kandidate për kryeministre.
Ndërkohë politikanët e krahut të majtë thanë se Macron po përpiqet “të anulojë rezultatin e zgjedhjeve legjislative”, rundi i dytë i të cilave u mbajt më 7 korrik.
Macron e ka pranuar dorëheqjen e kryeministrit Gabriel Attal, pas humbjeve të mëdha të partisë së tyre të qendrës në zgjedhje.
Megjithatë, Attal dhe ministrat e tij janë pajtuar që të mbeten në detyrë, në formën e një qeverie të përkohshme, derisa të emërohen zëvendësuesit e tyre.
Sipas sistemit francez, kryeministri emërohet tradicionalisht nga presidenti.
Lojërat Olimpike do të nisin të premten dhe do të përfundojnë më 11 gusht./Tëvë1/
