Edhe pak javë e ndajnë Kosovën drejtë anëtarësimit ose jo në Këshill të Evropës.
Në mes të muajit maj, 46 ministrat e Jashtëm të Këshillit të Evropës pritet ta marrin vendimin përfundimtar.
Meqë koha e votimit po afrohet anëtarët e komisionit për Punë të Jashtme të cilët vijnë nga opozita, po ankohen se nuk kanë informacion nëse qeveria është duke lobuar maksimalisht me aleatët e saj, për tu bërë pjesë e këtij trupi.
“Ka kohë që ne si opozitë që të ketë lobim, se a ka pasë lobim aq sa duhet a ka pasë koordinim nga kjo qeveri me aleatët tanë, këtë nuk e dimë sepse nuk kemi informacion as si Komision për Punë të Jashtme, por as si delegacion i kuvendit në Asamble të Këshillit, si deputet kemi bërë maksimumin dhe kemi arrit që të kemi votë pozitive, mbi 83% kanë votuar për anëtarësim në KiE”, thotë deputetja e PDK-së, Ariana Musliu-Shoshi.
Edhe nga Aleanca për Ardhmërinë e Kosovës, kanë të njëjtin qëndrim.
Besnik Tahiri nga AAK-ja, tha se Kosova nuk duhet ta humbasë këtë moment.
“Tani janë disa kushte që ne nuk i dimë se nuk kemi komunikim dhe këtë komunikim e ka qeveria. Qeveria duhet të bëjë gjithçka që mos t’ia humb Kosovës këtë mundësi për arsyeje se ky nuk është një moment që ka ndodh, por është një proces një pune e madhe që është bërë në Asamblenë Parlamentare, jom pozitiv sa i përket ftesës”, thotë deputeti i AAK-së, Besnik Tahiri.
Por nga qeveria janë të bindur në angazhimin e tyre.
Driton Hyseni tha për televizionin se ministrja e Punëve të Jashtme, Donika Gërvalla, dhe zëvendës kryeministri, Besnik Bislimi janë duke zhvilluar takime të përditshme me vendet anëtare.
“ Janë të fokusuar shumë me kontaktet që kemi qoftë me ministra me zyrtarë qeveritarë por edhe sidomos me deputet të vendeve të cilët janë anëtarë të Këshillit të Evropës që të japin maksimumin në drejtim të kalimit me sukses edhe fazës së fundit drejtë anëtarësimit të Këshillit të Evropës”, tha deputet i LVV-së, Driton Hyseni.
Nga 46 shtete anëtare sa janë në Këshillin e Evropës, Kosovës për t’u anëtarësuar në këtë instancë i duhet mbështetja prej dy të tretave.
