Deputeti i Lëvizjes Vetëvendosje, Adnan Rrustemi, thotë se takimi i Kurti – Vuçiq do të fokusohet në planin e zbatimit të marrëveshjes bazë Kosovë-Serbi.
Rrustemi kërkon nga ndërmjetësuesit e dialogut të mos fokusohen vetëm te themelimi i Asociacionit, por tek implementimi në tërësi i të gjitha pikave të marrëveshjes së Ohrit dhe asaj të Brukselit.
Sipas tij, bashkësia ndërkombëtare duhet të jetë më e vendosur për t’i bërë presion Serbisë që ta zbatojë ujdinë.
“Unë besoj se do të fokusohet tek plani i veprimit i detajuar dhe senkuencuar i zbatimit të marrëveshjes së Brukselit, për të cilin ne kemi thënë në vazhdimësi që kjo marrëveshje duhet të zbatohet në tërësi dhe në mënyrë të pakushtëzuar dhe menjëherë. Kjo nënkupton se të gjitha ato pika duhet të sekuencohen në mënyrë të drejtë, korrekte dhe gjithëpërfshirëse që garanton zbatim të marrëveshje”, thotë ai për KP.
Rrustemi është kritik ndaj përfaqësuesit të BE-së për dialogun, Miroslav Lajçak, për të cilin thotë se ka pasur qasje të gabuar në këtë proces.
Mirëpo shpreson se i njëjti është ndërgjegjësuar dhe ka kuptuar se normalizimi i raporteve Kosovë – Serbi, bëhet vetëm përmes zbatimit të marrëveshjes në mirëbesim dhe të pakushtëzuar.
“Uroj të ketë një ndërgjegjësim të fasilituesit që rruga e vetme drejt normalizimit të plotë të marrëdhënieve Kosovë-Serbi është përmes zbatimit në mirëbesim dhe të pakushtëzuar të kësaj marrëveshje dhe njohjes reciproke të Kosovës dhe Serbisë, po ashtu edhe respektimit të ndërtimit të raporteve të fqinjësisë së mirë mbi bazën e Kartës së OKB-së”, shton ai.
Rrustemi, i cili është edhe kryetar i Komisionit parlamentar për legjislacion, thotë se masat e ndëshkuese të Bashkimit Evropian ndaj Kosovës duhet të hiqen sa më shpejtë që është mundur.
“Masat kanë qenë të padrejta ndaj Kosovës dhe e bëjnë dialogun asimetrik. Nuk mund të kemi proces të dialogut në kuptimin e një mjedisi të plotë ku palët dialogun e bazojnë në argumente për sa kohë ka masa mbi Kosovën. Këto e bëjnë procesin e dialogut të pabarabartë përveçqë janë të padrejta dhe që e dëmtojnë dhe lëndojnë Kosovën”, deklaron Rrustemi.
