Pas certifikimit të rezultateve zgjedhore të 9 shkurtit, është hapur rruga për formimin e institucioneve të reja.
Deri tash, partitë politike në Kosovë nuk kanë arritur ndonjë marrëveshje.
Partia fituese e zgjedhjeve, Lëvizja Vetëvendosje në vazhdimësi kanë deklaruar se nuk do të ndërmarrin asnjë veprim pa u certifikuar rezultat.
Qëndrimin, e ka ripërsëritur gjatë ditës, zëdhënësi i partisë, Arlind Manxhuka.
“Ashtu siç kemi deklaruar që presim certifikimin ai rend paraprak për të filluar proceset e tjera. Ndërkohë, deri tani kemi qenë në pritje të përgjigjeve në ankesat tona në PZAP, përkatësisht Supreme duke qenë të bindur dhe duke e evidentuar me fakte manipulimin e votave përmes postës që ka çuar në deformimin e vullnetit qytetar. Pas shtjerrës së të gjithë hapave institucionalë sigurisht se do t’i vije edhe rendi formimit të Qeverisë”, ka thënë Manxhuka për Tëvë1.
Ndryshe prej VV-së, partitë opozitare kanë zhvilluar disa takime.
Zafir Berisha nga Nisma Socialdemokrate tregon se janë takuar me PDK-në, dhe se e mbështesin një koalicion me opozitën.
Berisha, i cili ka dështuar të siguroj ulëse në Kuvend, ka një qëndrim krejt të ndryshëm nga lideri i partisë, Fatmir Limaj, për një bashkëpunim të mundshëm me Lëvizjen Vetëvendosje.
Thirrje që të bëhen bashkë të gjithë partitë, pozitë e opozitë iu bën profesori universitar, Mazllum Baraliu.
Certifikimi i rezultateve të zgjedhjeve parlamentare u bë pasditen e së enjtes.
