Seanca e jashtëzakonshme e thirrur nga grupi parlamentar i Lidhjes Demokratike të Kosovës, për përmirësimin e gjendjes në korporate energjetike KEK, nuk pati kuorum për tu votuar këtë rezolutë të partive opozitare. Kryetari i grupit parlamentar të LDK-së, Arben Gashi ka thënë se koordinatorja e VV-së, Dejona Mihali ka ndërhyrë jashtëligjshëm në menaxhimin e KEK-ut derisa bëri thirrje të bëhen hetime të plota në KEK.
Seancën e katërt të jashtëzakonshme brenda pak javësh e thirrën partitë opozitare.
Ndryshe nga tri të parat, kësaj radhe punimet i drejtoi, kryetari i Kuvendit, Glauk Konjufca që nuk mori pjesë në seancat e kaluara.
Por, asnjë nga bashkëpartiakët e tij nuk ishte në sallë.
Megjithatë punimet vazhduan.
Lidhja Demokratike e Kosovës e cila kërkoi rezolutë për gjendjen në korporatën energjetike KEK.
“Kuvendi i Kosovës kërkon nga organet kompetente që të vazhdojnë hetimet e plota dhe të thelluara për skandalet e KEK-ut, duke përfshirë keqmenaxhimin e tenderëve një-burimor dhe mungesën e konkurrencës në prokurimin publik. Të gjitha shkeljet e konstatuara të ndiqen penalisht. Dy, Kuvendi i Kosovës kërkon nga Qeveria e Kosovës dhe bordi i KEK-ut që të raportojnë për kontratën e shitblerjes së energjisë elektrike gjatë periudhës 2001-2024, duke përfshirë kushtet e favorshme për palët e treta dhe ndikimin financiar në financat publike”, tha Arben Gashi, shef i Grupit Paralamnetar të LDK-së.
E për kontratat njëburimore, foli shefi i deputetëve të PDK-së, Abelard Tahiri.
“Në vitin e pestë të drejtimit të KEK-ut nga LVV-ja i kemi evidentuar që janë dhënë 105 milionë euro kontrata njëburimore. Po flasim vetëm për vitin 2022-2023, jo për vitin 2020-2021 e as vitin 2024. Pra kjo korporatë ka kontraktuar 105 milionë euro kontrata njëburimore. Kjo situatë nuk ka ndodhur asnjëherë në KEK”, tha Tahiri.
Nga AAK-ja, akuzuan mazhorancën për mos pjesëmarrje në seancat e jashtëzakonshme të thirrura së fundi nga opozita.
“Tema dhe skandale që së paku meritojnë një përgjigje prej atyre që kanë fituar 50 për qind dhe na patën lodh krejt dhe drejt, e patën lodh një popull sa të mirë, të pastër dhe akademikë janë. E sot, thatë këtu, thatë këtu. S’janë as kolegët deputetë të shumicës dhe asnjë njeri i Qeverisë së Kosovës që me dhënë një fjalë me argumentua apo kundërshtuar një temë që është skandal publik që meriton përgjigje”, tha Besnik Tahiri shef i Grupit Paralamnetar.
Pas diskutimit, u hodh në votim rezoluta, e cila dështoi së kaluari në mungesë kuorumi.
Si rrjedhojë u mbyllën punimet.
