Përmes një komunikate, LVV ka publikuar kontratën mes Komunës së Prishtinës dhe “Parking Center” ku thuhet se tarifat e nënshkruara janë tjera nga ato që janë publikuar të martën nga ky operator.
“Në kontratën koncesionare në mes të Komunës së Prishtinës dhe shoqërisë tregtare ’Parking Center’ sh.p.k., të nënshkruar me datën 30.10.2019, konkretisht në shtojcën 9 që ka të bëjë me tarifat e parkingut, janë të caktuara tjera çmime nga ato që tashmë i kemi parë në media dhe në vet objektin e parkingut. Po ashtu, në këtë shtojcë, thuhet se çmimet indeksohen një herë në 3 vjet dhe për çdo ndryshim duhet pajtimi i të dy palëve”, thuhet në njoftim.
Sipas kësaj Qendre, çmimet e vendosura tani janë shumë më të larta se çmimet e dakorduara me kontratë.
“Siç mund ta shihni në fotot që i kemi postuar, çmimet e vendosura tani (foto 1) janë shumë më të larta se çmimet e dakorduara me kontratë (foto 2). Në këtë rast është evidente se kemi të bëjmë me shkelje të kontratës nga ana e operatorit privat dhe miratim në heshtje nga ana e organeve komunale, konkretisht kryetari Rama dhe kabineti i tij”, thuhet në reagim.
Po ashtu, kjo Qendër e LVV-së ka kërkuar nga kryetari i Komunës, Përparim Rama që ta sqarojnë këtë çështje.
Ndryshe, ka pasur reagime të shumta rreth çmimores në këtë parking, pasi që për një orë çmimi ka qenë 1 euro, për 24 orë ka qenë 15 euro, për 6 muaj një mijë e 350 euro, kurse për një vit dy mijë e 500 euro./teve1.info/
