Shefi i Asamblistëve të LVV-së në Prishtinë, Gëzim Sveçla ka akuzuar kryetarin Perparim Rama për tentim të ndërsyerjes së Policisë së Kosovës ndaj Komunës së Prishtinës.
Sipas tij Rama e ka keqpërdorur kontratën për punë sekondare që Komuna e Prishtinës e ka me Policinë e Kosovës, ashtu siç ‘kanë kontrata të tilla shumë institucione tjera të vendit’.
“Vazhdojnë përpjekjet për mashtrim nga ana e kryetarit, i cili paraqet angazhimin e policisë sekondare si polici komunale në shërbim të tij. Është e qartë se në këtë rast Përparim Rama, ka keqpërdorur kontratën për punë sekondare që Komuna e Prishtinës e ka me Policinë e Kosovës, ashtu siç kanë kontrata të tilla shumë institucione tjera të vendit. Përparimi edhe më parë ka mashtruar me deklarim publik, duke e quajtur Drejtorinë e Policisë së Kryeqytetit si “polici komunale të kryeqytetit”, ndërsa sot, prap duke mashtruar, tentoi ta ndërsyej një institucion qendror ndaj një institucioni tjetër qendror”, ka shkruar Sveçla në Facebook.
Ai tutje ka shtuar se Policia është institucion qendror dhe i shërben vetëm ligjit e interesit publik e jo ‘tekave personale të individëve që i keqpërdorin për qëllime të përfitimit personal e klanor’.
“Policia është institucion qendror, me hierarki të qartë dhe funksionon si agjenci ekzekutive e Ministrisë së Punëve të Brendshme. Policia i shërben vetëm ligjit dhe interesit publik e jo tekave personale dhe pretendimeve të pabazuara të individëve që i keqpërdorin për qëllime të përfitimit personal e klanor”, ka shtuar ai.
Kryetari i Komunës së Prishtinës tha të hënën pas rinisjes së punimeve në sheshin “Xhorxh Bush” në kundërshtim me vendimin e Inspektoratit të Trashëgimisë Kulturore se “Policia e dërgon inspektoratin te shpija”.
