Lëvizja Vetëvendosje ka mbajtur sot mbledhje me qendrat e saj, takim në të cilin u fol për situatën politike në vend dhe për çështje organizative.
Përmes një postimi në Facebook, nga LVV-ja bëjnë të ditur se gjatë mbledhjes u ritheksuan të arriturat e qeverisjes dhe miratimi i buxhetit për viti 2024, raporton teve1.info
“Në lidhje me situatën politike në vend u ritheksuan të arriturat e qeverisjes tonë dhe miratimi i buxhetit për vitin 2024 që njëherit është buxheti më i lartë i miratuar ndonjëherë në vlerë prej 3.3 miliardë euro. Pavarësisht sfidave të mëdha globale, pandemisë, luftës në Ukrainë, qeverisja jonë ka arritur të shtojë 1 miliardë euro në buxhetin e vendit për vetëm 2 vjet e gjysmë qeverisje. Krahas rritjes së të hyrave tatimore në shifra rekord, që pritet të rriten edhe më tej më 2024, edhe investimet kapitale do të ngriten në 859 milionë euro. Buxheti për 2024 do të përfshijë investime të mëdha në ekonomi, mbështetje të bizneseve, mbështetje të punësimit, vazhdim të mbështetjes për pjesët më të ndjeshme të shoqërisë tonë, dhe komunat do të kenë mbështetje rekord me buxhet”, thuhet në njoftim.
Tutje, theksohet se mbledhje u fol edhe “për sigurinë në vend, për ngjarjet e rënda, dhunën që kemi parë të ushtrohet kohën e fundit dhe për reagimin e shpejtë, profesional dhe efikas të organeve të rendit karshi tyre duke i zënë kriminelët për t’i vënë para drejtësisë”.
Sa i përket çështjeve organizative, bëhet e ditur se u fol për punën që bëhet në qendrat e LVV-së.
“Te çështjet organizative u fol për punën që po bëhet nëpër qendrat e Lëvizjes VETËVENDOSJE! në formimin e pikave, zgjerimin e anëtarësisë, dhe në veçanti për dy organizatat tona GVV dhe RVV të cilat kanë konsoliduar strukturat e tyre dhe tashmë po zhvillojnë aktivitete të shumta. Koncentrimi i organizatës në nivel lokal është qendror dhe duhet intensifikuar edhe më shumë prej aty ku jemi në qeverisje e deri aty ku jemi opozitë, si alternativa e vërtetë, si alternativa e duhur qeverisëse, u tha në këtë mbledhje”, thuhet në njoftimin e partisë.
Pjesë e kësaj mbledhjeje ishin kryetari i Lëvizjes, njëherazi Kryeministri, Albin Kurti, sekretari organizativ, Alim Rama, koordinatori i qendrave, Valon Hoti, nënkryetarja e GVV-së, deputetja, Tinka Kurti, koordinatori i RVV-së, Libron Kelmendi, kryetarët/et e qendrave, dhe kryetaret/ët e GVV-së dhe RVV-së.
