Vendimi i Komisionit Qendror të Zgjedhjeve i datës 26 nëntor për votim jashtë hapësirave diplomatike, që u mor pas propozimit nga Ministria e Punëve të Jashtme dhe diasporës, nxiti goxha debat në mbledhje.
Por, diskutimi nuk u përmbyll aty.
Kjo pasi, që Lidhja Demokratike e Kosovës, dërgoi ankesë në Panelin Zgjedhor për Ankesa dhe Parashtresa duke e kundërshtuar që votimi i diasporës të bëhet në hapësira shtesë, jashtë përfaqësive diplomatike.
Këto ambiente, sipas adresave të publikuara nga KQZ ishin kryesisht restorante.
Pesë prej qendrave u shtuan në Gjermani, tri në Zvicër, një në Mbretëri të Bashkuar dhe një tjetër një Shtetet e Bashkuara të Amerikë.
E këtë ankesë të LDK-së, PZAP e aprovoi.
PZAP-ja prerazi tha se votimi të bëhet vetëm brenda ambasadave si herën e kaluar.
“Pranohet e bazuar ankesa e datës 27.11.2025 e parashtruar nga subjekti politik Lidhja Demokratike e Kosovës (LDK) me seli në Prishtinë, NDRYSHOHET Vendimi Nr.01/3438- 2025, i datës 26.11.2025 i Komisionit Qendror i Zgjedhjeve, sa i përket Qendrave të Votimit jashtë Kosovës, numrit të vendvotimeve si dhe listën e qendrave të votimit, ashtu që Qendra të Votimit jashtë Kosovës për Zgjedhjet e Parakohshme për Kuvendin e Republikës së Kosovës, që do të mbahen me 28 dhjetor 2025, caktohen përfaqësitë diplomatike të Republikës së Kosovës apo hapësirat e tyre. Lista e Qendrave të Votimit, si në pikën I të këtij vendimi përbëhet vetëm nga Qendrat e Votimit në përfaqësitë diplomatike të Republikës së Kosovës apo hapësirat e tyre”, thuhet nw vendimin e PZAP-së.
Këtë vendim të PZAP-së si përpjekje për të ndalë votën e mërgatës e patën zyrtarë të Lëvizjes Vetëvendosje.
“Është zhgënjyese të shihet përpjekja e vazhdueshme dhe kaq e hapur për të penguar votimin e mërgatës në zgjedhjet e 28 dhjetorit. Mërgata është pjesë e pandashme e vendit dhe çdo tentim për t’i kufizuar këto të drejta është sulm ndaj vetë procesit demokratik”, u shpreh Albulena Haxhiu.
Por, kryetari i Lidhjes Demokratike të Kosovës, Lumir Abdixhiku thotë se në këtë formë po mbrohet vota e qytetarëve.
“Sekt i Vetëvendosjes nuk e do këtë. Ata duan të manipulojnë. T’i printojnë vetë fletëvotimet, t’i mbushin vetë, t’i manipulojnë votat vetë. Të prodhojnë rezultatin që s’e marrin dot me besimin e qytetarëve. Një herë provuan ta kthejnë sistemin e vjetër të votimit me email, ku një militant mbushte qindra fletëvotime para televizorit. Pastaj provuan votime në depo mallrash, salla dasmash e restorante, jashtë ambasadave e konsullatave, ku nuk ka kontroll e monitorim. PZAP nuk e lejoi”, u shpreh ai.
Që këto vende nuk janë adekuate për votim dhe janë të kundërligjshme e thotë edhe Naim Jakaj nga Instituti i Kosovës për Drejtësi.
Në shkurt për zgjedhjet e rregullta parlamentare, procesi i votimit u zhvillua në 43 vendvotime në 16 ambasada dhe 14 konsullata të Republikës së Kosovës, në 19 shtete të ndryshme.
