Lëvizja Vetëvendosje ka njoftuar se të enjten ka dorëzuar përmes postës ankesë në Panelin Zgjedhor për Ankesa dhe Parashtresa (PZAP) kundër vendimit për certifikimin e Listës Serbe në emër të Komisionit Qendror të Zgjedhjeve.
Sipas LVV-së nxjerrja e vendimit në emër të KQZ-së por pa miratim të KQZ-së është sulmi i radhës ndaj rendit ligjor për shkak të Listës Serbe.
Në njoftim thuhet se përmes kësaj ankese LVV-ja synon ta prapësojë këtë vendim të paligjshëm, të mbrojë rendin ligjor dhe të pamundësojë certifikimin e Listës Serbe.
“Ditë më parë KQZ në mënyrë të paprecedent dhe në kundërshtim me Ligjin për Zgjedhjet e Përgjithshme, e lejoi Listën Serbe që të marrë pjesë në zgjedhje Sot, Lëvizja VETËVENDOSJE! ka dorëzuar përmes postës ankesë në PZAP kundër vendimit për certifikimin e Listës Serbe në emër të KQZ-së, me kërkesën për anulimin e këtij vendimi. Nxjerrja e vendimit në emër të KQZ-së, por pa miratim të KQZ-së është sulmi i radhës ndaj rendit tonë ligjor për shkak të Listës Serbe. Secili vendim i KQZ-së duhet t’i nënshtrohet votimit nga anëtarët e KQZ-së. Ky vendim nuk është i KQZ-së, sepse nuk është votuar. Është i paligjshëm, sepse bie ndesh me Ligjin për Zgjedhjet e Përgjithshme. Ndërsa Lista Serbe nuk është certifikuar në përputhje me Ligjin, por është kontrabanduar kundërligjshëm. Lista Serbe ka qenë dhe mbetet partia e kryeterroristit Radojçiq. Ajo dikur përdorej nga Radojçiqi kundër shtetit të Kosovës, kurse tani po shërben si struktura që mbron dhe amniston terrorizmin. Institucionet e pavaruara të Republikës, siç është KQZ jo vetëm që duhet të mbrojnë vlerat si rendi ligjor e kushtetues, por së paku duhet të ruajnë integritetin e tyre institucional. Nuk mund të lejohet që për t’i bërë vend në fletëvotim një strukture që e lufton shtetin e Kosovës dhe merr në mbrojtje terroristët, të shkelet kaq brutalisht Ligji për Zgjedhje dhe çdo praktikë e rregullt. Andaj, Lëvizja VETËVENDOSJE! përmes kësaj ankese synon ta prapësojë këtë vendim të paligjshëm, të mbrojë rendin ligjor dhe të pamundësojë certifikimin e Listës Serbe”, thuhet në njoftim.
Ndryshe, më 23 dhjetor Lista Serbe në mbledhjen e KQZ-së nuk është certifikuar për pjesëmarrje në zgjedhje, pas kundërshtimeve të LVV-së.
Më pas Lista Serbe është ankuar lidhur me këtë vendim në Panelin Zgjedhor për Ankesa dhe Parashtresa (PZAP) i cili e ka pranuar kërkesën e tyre dhe ka urdhëruar KQZ-në që ta certifikojë.
Ndërkaq, me 31 dhjetor KQZ-ja ka thënë se vendimi i PZAP-së për certifikim të Listës Serbe për zgjedhjet e 9 shkurtit, është i plotfuqishëm dhe duhet zbatuar.
