Kryetari i Këshillit Kombëtar Shqiptar, Nevzad Lutfiu ka thënë se pasivizimi i adresave të shqiptarëve të Luginës është një proces i njohur ndërkombëtarisht si proces selektiv i spastrimit etnik.
Sipas Lutfiut ky proces është një goditje e rëndë për shqiptarët e Luginës së Preshevës të cilët siç është shprehur në momentin që migrojnë përballen me këtë gjë.
“Pasivizimi i adresave është një fenomen apo një goditje e cila me njëfarë mënyre po e realizon goditjen e fundit ndaj komunitetit tonë, pra pasivizimi i adresave është tashmë i njohur ndërkombëtarisht si proces selektiv i cili po bën spastrim etnik. Si rezultat i këtij procesi shqiptarët në Medvegjë janë defaktorizu nga jeta publike, tashmë target i shtetit janë shqiptarët në Komunën e Bujanocit dhe ky proces normalisht që është një goditje jashtëzakonisht e rëndë për shqiptarët e Luginës së Preshevës sepse shqiptarët e Luginës në momentin kur po emigrojnë për shkak të mungesës së perspektivës atëhere atyre po iu pasivizohen adresat”, ka deklaruar ai në emisionin “Ditari”, në Tëvë1.
Ai më tej ka shtuar se është i bindur që për këtë lloj diskriminimi duhet të vazhdojnë rrugën e reagimit përmes aksioneve simbolike dhe protestave.
“Unë besoj se ne duhet të vazhdojmë këtë rrugë të reagimit, ne vazhdimisht i kemi raportuar faktorit ndërkombëtar për çdo lloj diskriminimi me të cilin jemi përballur, por tashmë e kemi parë të arsyeshme që pakënaqësitë tona ti shprehim edhe në rrugë. Kemi realizuar tri protesta vitin e kaluar, në Bujanoc, Preshevë dhe Medvegjë, kemi zhvilluar disa aksione para institucioneve të cilat në mënyrë direkte shkelin të drejtat e njeriut, edhe normalisht jam i bindur që kjo është rrugë e cila duhet të ndiqet dhe aksione të tilla duhet ti bashkojnë edhe qytetarët e tjerë, sepse nuk ka familje shqiptare në vendin tonë e cila në një mënyrë apo në një tjetër nuk është prekur nga ky lloj i diskriminimit”, ka shtuar Lutfiu.
Shqiptarët në Luginën e Preshevës të martën kanë realizuar një aksion simbolik para stacionit policor dhe gjykatës themelore në Bujanoc, në shenjë proteste kundër diskriminimit dhe padrejtësisë së autoriteteve të Serbisë kundër komunitetit shqiptar.
Shqiptarët e Luginës së Preshevës me aksion simbolik kundër diskriminimit serb
