Trajneri i mirënjohur, Tahir Lushtaku ka marrë drejtimin e skuadrës së Trepçës nga Mitrovica, e cila garon në Ligën e Parë të Kosovës në futboll.
Emërimi i Lushtakut është zyrtarizuar të hënën nga Trepça, ekip që po synon rikthimin në elitën e futbollit kosovar.
Në postin e trajnerit te Trepça, Lushtaku ka zëvendësuar Emin Baliqin, ndërsa më herët ka drejtuar me plot sukses skuadrën e Drenicës.
Në prezantimin e tij, Lushtaku ka falënderuar klubin e Trepçës për besimin kurse ka thënë se është plotësisht i vetëdijshëm për përgjegjësinë që ka fanella e kësaj skuadre ikonike.
Ai ka thënë se do të jap gjithçka nga vetja për ta kthyer energjinë, besimin dhe rezultatet pozitive te Trepça, ekip ky me histori të madhe.
Aktualisht, Trepça renditet e nënta në tabelë me 23 pikë të tubuara pas 15 ndeshjeve të luajtura, ndërsa Lushtaku në krye të ekipit do të debutojë këtë fundjavë në derbin kundër Feronikelit ’74 që luhet në Mitrovicë.
