Mërgim Lushtaku nga Partia Demokratike e Kosovës ka deklaruar se Qeveria e Kosovës me ndihmën prej 100 eurove për fëmijët dhe pensionistët ka mashtruar qytetarët e vendit.
Kjo pasi sipas Lushtakut, përgjatë tërë vitit Qeveria nuk është kujtuar të ndihmojë këtë shtresë të qytetarëve.
“Për fat të keq në kurrizin e qytetarëve po e shohim se çfarë është në gjendje të bëjë Qeveria Kurti vetëm për t’i mashtruar qytetarët dhe vetëm për të paraqitur hipokrizinë e tyre, edhe në fund të vitit duke bërë që gjoja në fund të vitit po e ndihmon qytetarin dhe kategoritë më të ndjeshme. Ndërsa këta 11 muaj nuk është kujtuar që t’i ndihmojë ato shtresa të qytetarëve siç jane fëmijët dhe pensionistët”, tha Lushtaku në foltoren e Kuvendit.
Derisa sipas deputetit të PDK-së, Qeveria Kurti do të mbahet në mend vetëm për demagogji dhe keqqeverisje.
“Puna e mirë shihet në mëngjes çdo herë është thënë dhe kemi pa që nga fillimi i kësaj Qeverie asnjëherë nuk kanë ditur as të planifikojnë, por as të realizojnë as një projekt kapital. Prandaj sigurisht që edhe do të mbahen në mend vetëm për demagogji dhe vetëm për keqqeverisje, për mungesë të transparencës, për bllokim të komisioneve hetimore, për fshehje të hajnive, dhe për degradim të çdo institucioni dhe çdo dinjiteti të qytetarëve të vendit”, shtoi Lushtaku./teve1.info./
