Deputeti i Partisë Demokratike të Kosovës (PDK), Mërgim Lushtaku thotë se buxheti i vitit 2024 nuk i paraqet kërkesat e qytetarëve.
Gjatë fjalës së tij në Kuvend, Lushtaku theksoi se i njëjti duhet të jetë më i lartë në shifër, përcjell teve1.info
“Ne si Grup Parlamentar i PDK-së, e kemi shqyrtuar projektligjin për ndarjet buxhetore për vitin 2024, prandaj lirisht mund të themi se buxheti i vitit 2024 nuk paraqet kërkesat dhe pritshmëritë e qytetarëve, bizneseve, por as të organizatave buxhetore. Si i tillë duhet më i madh në shifër, por në një situatë krize jo vetëm ekonomike, por edhe të mungesës së lidershipit, ku gjithçka është më e shtrenjtë, i lë më të varfër qytetarët e Kosovës”, deklaroi deputeti i PDK-së.
Sipas tij, “buxheti shtetëror nuk është hajgare”.
“Nëse nuk hartohet siç duhet, le që nuk ndihmon, por ka fuqinë me përkeqësu edhe më shumë gjendjen në nivele ekstreme”, shtoi Lushtaku.
Në seancën e sotme në Kuvend, në rend dite është shqyrtimi i parë i Projektligjit mbi ndarjet buxhetore për Buxhetin e Kosovës për vitin 2024.
Kryeministri Albin Kurti ka njoftuar se buxheti i Kosovës për vitin 2024 do të jetë 3 miliardë e 314 milionë euro. /Teve1.info/
