Deputeti i Partisë Demokratike të Kosovës (PDK), Mergim Lushtaku, ka thënë se buxheti i shtetit nuk është shaka, pasi sipas tij nëse nuk hartohet siç duhet vetëm mund ta përkeqësojë situatën.
Lushtaku ka shtuar se me qeverinë Kurti nuk po ndodh një planifikim i buxhetit që do të kontribuonte në përmbushjen e nevojave të qytetarëve.
“Këta besimin e qytetarit e kanë marrë si privilegj dhe po mendojnë që në karriget e pushtetit do të qëndrojnë përgjithmonë. Fjalimet populliste nuk po i ngopin qytetarët. Një planifikim i buxhetit do të kontribuonte në përmbushjen e nevojave të qytetarëve, gjë që nuk po ndodh me këtë Qeveri. Buxheti i shtetit nuk është hajgare…Nëse nuk hartohet siç, duhet jo vetëm që nuk ndihmon, por mundet me përkeqësu situatën. Planifikimi i shpenzimeve është i keq pa kurrfarë efekti në zhvillimin ekonomik dhe përmirësimin e jetës së qytetarëve në përgjithësi. Buxheti që nga viti i paraluftës është rrit nga viti në vit. Rritja e buxhetit te pjesa e të hyrave nuk paraqet ndonjë risi”, ka thënë ai.
Kuvendi i Kosovës është duke mbajtur seancë plenare ku po diskutohet për të vetmen pikë të rendit të ditës që është shqyrtimi i parë i Projektligjit për Buxhetin e Kosovës për vitin 2025.
Buxheti i planifikuar për vitin 2025, është 3.6 miliardë euro./teve1.info/
