Deputeti Basha duke e kritikuar Lushtakun për kundërshtimin që i kishte bërë Projekt-Kodit Civil, ka thënë se “Lushtaku bën Bismilah nëpër tenderë”, duke aluduar kështu se Lushtaku në njërën anë paraqitet si mysliman i devotshëm duke e kundërshtuar Kodin i cili do t’ua lejonte martesën personave të gjinisë së njëjtë, por në anën tjetër përfiton në forma joligjore nga tenderët publikë.
Por, ndaj kësaj deklarate ka reaguar Lushtaku përmes një shkrimi në “Facebook” duke thënë se asnjëherë nuk ka përfituar nga tenderët. Prandaj, ka thënë se Basha ose duhet të kërkojë falje ose do të përballet me padi për shpifje.
“Dua të njoftoj opinionin publik se ASNJËHERË në jetën time nuk kam fituar tenderë publik as në mënyrë direkte as indirekte. Nuk është hera e parë që deputeti në fjalë shpif, por madje vazhdon tutje duke fyer dhe tallur me gjëjen më të shenjtë në botë, besimin në Zot. Islamin nuk do ta mbroj sepse e mbron Zoti, por për shpifjet ndaj meje do të kujdesem që të ushtroj padi në Gjykatën kompetente nëse deputeti i lartëcekur nuk kërkon falje publike”, ka shkruar Lushtaku.
