Deputetja e Lidhjes Demokratike të Kosovës, Jehona Lushaku Sadriu tha se qeveria në detyrë po bëhet “simbol i korrupsionit në vend”. Ajo tha se mirëpresin çdo hetim, që sipas saj sqaron tenderët një burimor.
Para fillimit të seancës – tentim i 45-të për konstituim të Kuvendit – deputetja e LDK-së tha se po pamundësohet kjo në mënyrë që “të mbahet një kryeministër pa legjitimitet”.
“Të gjithë këta që i kanë uzurpuar zyrat e qeverisë bartin përgjegjësi për gjitha këto vendime që po i marrin në mënyrë jo kushtetuese. Aq më tepër për procedura prokurimi e për procedura të tjera ku nënshkrimet validojnë për zgjedhje të cilat janë në dëm të buxhetit të Kosovës. Ne vërtetë e mirëpresim çfarëdo lloj hetimi për të sqaruar tenderët një burimor, është e pakapshme qysh një qeveri ka ardhur në pushtet, një parti politike ka ardhur në pushtet me kauzën kundër korrupsionit e tash po bëhet simbol i korrupsionit në vend. Pikërisht ato procese që i ka kritikuar është duke i aplikuar edhe në kohë rekorde, krejt në dëm të buxhetit të Kosovës, në dëm të parasë publike, në dëm të buxhetit të secilit qytetar”, deklaroi ajo.
Kosova ka mbajtur zgjedhjet parlamentare më 9 shkurt por ende nuk është bërë formimi i institucioneve të reja.
Procesi ka ngecur të zgjedhja e kryetarit të Kuvendit për çka Lëvizja Vetëvendosje, në koalicion me Guxo dhe Alternativa, nuk po arrin t’i sigurojë 61 votat e nevojshme për ta zgjedhur Albulena Haxhiun.
