Anëtarja e Kryesisë së Lidhjes Demokratike të Kosovës, Jehona Lushaku-Sadriu, ka thënë se Ministrisë së Arsimit do t’i kushtojë nëntë milionë euro më shtrenjtë se që ishte planifikuar furnizimi i nxënësve me tekste shkollore.
Ajo në Facebook ka thënë se kostoja e rimbursimit të teksteve shkollore është rreth 13 milionë e 500 mijë euro.
“Në bazë të njoftimit që lansoi Ministrja Nagavci para pak minutash dhe bazuar në statistikat që MASHT ka të publikuara, mund të llogaritet kostoja e shpenzimeve për tekste shkollore:
Gjithsej nxënës në shkollën fillore: 132 483. Kostoja e teksteve shkollore për nxënës 80 euro dhe gjithsej do të kushtojë: 10 598 640 Euro. Gjithsej nxënës në shkollën e mesme të ultë janë: 95 501. Kostoja e kompenzimi për materiale shkollore do të bëhet 30 Euro për nxënës dhe do të kushtojë: 2 865 030 Euro Gjithsej nxënës: 227 984 Gjithsej kostoja e rimbursimit të teksteve shkollore: 13 463 670 Euro. A po i kushtojkan tekstet shkollore buxhetit të Kosovës tani ma lirë, a ma shtrenjtë? 13 Milion është shumë më shtrenjtë se 4 Milion, sa kishte paraparë për tekste MASHT. Dmth 9 Milion më shumë”, ka shkruar ajo.
Ndryshe Ministrja e Arsimit, Arbërie Nagavci ka njoftuar sot se nga e premtja prindërit mund të aplikojnë për subvencionimin e teksteve shkollore. Kurse mjetet do të dalin në xhirollogaritë e tyre që nga fillimi i javës së ardhshme.
Nagavci theksoi se do të ndahen nga 80 euro për nxënësit nga klasa 1 deri 5 për blerjen e teksteve dhe materialeve shkollore.
Kurse për nxënësit nga klasa e 6 deri 9 të cilët tashmë i kanë siguruar tekstet shkollore, do të ndahen nga 30 euro si mbështetje për materiale të tjera shkollore./teve1.info./