Deputetja e LDK-së, Jehona Lushaku, ka reaguar pas përfundimit të Kuvendit të Lidhjes Demokratike të Kosovës, ku shumica e delegatëve vendosën të mos pranojnë dorëheqjen e Lumir Abdixhikut nga pozita e kryetarit të partisë.
Sipas saj, Abdixhiku ka paraqitur dy deklarata politike që synojnë reformimin e brendshëm të LDK-së dhe përcaktimin e qëndrimeve të partisë ndaj zhvillimeve politike në vend.
Ajo thotë se të dyja deklaratat u miratuan me shumicë votash nga delegatët.
“Kryetari Abdixhiku për herë të parë iu nënshtrua votëbesimit pas rezultatit të zgjedhjeve dhe është konfirmuar sërish me shumicë votash. Ai ka prezantuar dy deklarata politike: një për reformimin e brendshëm të partisë dhe një për qëndrimet e LDK-së ndaj zhvillimeve politike në vend, të dyja të miratuara me shumicë votash”, ka thënë Lushaku-Sadriu.
Ajo para gazetarëve deklaroi se Abdixhiku do të jetë përgjegjës për ta reformuar partinë.
“Ky proces përfshin reformimin e degëve, nën-degëve, Kryesisë dhe strukturave të tjera partiake, me qëllim që LDK-ja të arrijë rezultate më të mira në të ardhmen”. /teve1.info/
