Kryetarja e Forumit të Gruas së LDK-së, Jehona Lushaku tha se për herë të parë në histori të Kosovës, Departamenti Amerikan i Shtetit e ka përdorur fjalën “zhgënjim” ndaj një Qeverie të Kosovës.
Sipas saj, kjo po vjen për shkak të raporteve të tendosura mes vendeve.
“Komunikimi diku ka ngecur dhe ka ngecje serioze në këtë raport, kur e dimë se kemi një dialog edhe me prezencën e ShBA-së, ne e kemi humbur primatin e Aleancës në një kohë shumë të rëndësishme për historinë e Kosovës dhe gjeostrategjinë si veprim”, ka thënë ajo në Respublika në Tëvë 1.
“Kjo na jep një pasqyrë joserioze ose e vë në pah joseriozitetin e Qeverisë karshi ShBA-së dhe kjo është fatkeqësi sepse asnjëherë në historinë e Kosovës nuk ka pasur një sjellje të tillë ndaj ShBA-së”, ka thënë Lushaku.
Sipas saj është faji i Qeverisë së Kosovës që primatin po e merr Serbia në këtë proces.
“Dmth kemi arritur në një kohë kur ShBA-ja dhe BE-ja i kërkon Serbisë të vëjë sanksione ndaj Rusisë, kemi arritur për shkak të neglizhencës sonë ose për arsye të tjera negociuese të cilat kryeministri nuk i sheh të rëndësishme, duke ua përmendur edhe sovranitetin dhe elemente të tjera që janë të nënkuptueshme, kemi arritur që t’ia japim primatin Serbisë dhe ajo t’i ketë dyert e hapura në ShBA”, ka shtuar Lushaku.
