Kryesia e Lidhjes Demokratike të Kosovës ka propozuar Lumir Abdixhikun si kandidat për kryeministër në zgjedhjet e jashtëzakonshme parlamentare që do të mbahen më 28 dhjetor.
Pas përfundimit të takimit, Abdixhiku mbajti një konferencë për media, ku bëri të ditur se propozohet nga Kryesia për t’u prezantuar në Këshillin e Përgjithshëm të partisë.
“Te çështja e kandidatit të LDK-së nuk zgjati shumë diskutimi, ishte shkurt. Kryesia e LDK-së konsideron se, përderisa ka kryetar partie, nuk ka nevojë të ketë tjetër kandidat për kryeministër. Prandaj më nominoi si propozim për Këshillin e Përgjithshëm të jem kandidat i LDK-së për kryeministër,” tha Abdixhiku.
Ai shtoi se nominimi i tij synon të përfaqësojë vizionin dhe përkushtimin e LDK-së për qeverisje të përgjegjshme dhe të qëndrueshme, ndërsa procesi i zgjedhjes së kandidatit do të finalizohet nga Këshilli i Përgjithshëm i partisë.
Abdixhiku tutje poashtu bëri me dije se ka hequr dorë nga e drejta për të bërë renditjen e listës.
“Hoqa dorë nga renditja për ta bërë listën…LDK garon e vetme në këtë garë, por brenda listës do të zhvillojë diskutime me akterë, parti që mund të jenë pjesë e listës”, tha Abdixhiku.
Ai tha se një pjesë e listës së kësaj partie për zgjedhjet e 28 dhjetorit mbetet e hapur, përfshirë edhe për Nismën e Fatmir Limaj.
“LDK do të kujdeset që një pjesë të listës së vetë, ta hapë për partitë e tjera, përfshirë edhe z. Limaj me deputetët e vetë. Për këtë çështje do të diskutojmë ditëve në vijim, por le të themi se kemi gatishmëri”, deklaroi ai.
“Jemi të hapur edhe për partitë, edhe për individë”, deklaroi Abdixhiku.
