Superfuqitë paralajmërojnë rend të ri botërorë, përderisa shtetet më të vogla, por me ndikim synojnë të ripozicionohen sa më mirë në këtë rend të ri.
Publicisti nga Shqipëria, Ben Blushi, me anë të një reagimi në facebook, ka thënë se në këto ndryshime eventuale të rrethanave, mund të ketë një bashkim në mes të Kosovës dhe Shqipërisë.
“Kosova ka vetëm një dalje nga hallet e një vendi shumë të vogël, pa det, me ekonomi modeste, me shumë emigracion dhe me aq shumë presion kufitar nga të gjitha anët. Të bashkohet me Shqipërinë. Ky do ishte një shpëtim për Kosovën dhe natyrisht edhe për Shqipërinë. Nëse Dombasi dhe Luhansku i bashkohen Rusisë, pse jo Kosova të mos i bashkohet Shqipërisë”, shkruan ai.
Ndërsa Mentor Nazarko në një deklarim për tëvë1 thotë se një bashkim Kosovë Shqipëri nuk e sheh si të shpejtë.
“Bashkimi kombëtar ose bashkimi i dy shteteve shqiptare, na duhet ta pranojmë që Kosova është në një kuptim një shtet shqiptar, është një skenar i cili i nevojitet edhe perëndimit. I nevojitet perëndimit sepse imagjinohet që për të racionalizuar bashkëpunimin e vet me këtë pjesë të rajonit, nuk do të kishte interes që të merrej pafundësisht me dy shtete shqiptare … çështjes së bashkimit kombëtar midis Kosovës dhe Shqipërisë, unë nuk e shoh të afërt më vjen keq ta them një zhvillim të tillë, por kjo nuk do të thotë që Shqipëria me Kosovën, autoritet e tyre politike të mos bashkëpunojnë me njëra tjetrën”,thotë as.
Politologu nga Kosova, Dritëro Arifi, thotë se bashkimi eventual mes Kosovës dhe Shqipërisë, varet edhe nga rrjedha e negociatave me Serbinë.
“Në këtë rast shqiptarët duhet të jenë më të kujdesshëm që të mos flasin shumë por, në rast se ka ndryshime të tilla ne duhet ta shikojmë edhe mundësinë pse jo edhe të një bashkimi Kosovë – Shqipëri, që besoj që do t’i kontribuonte edhe më shumë ndoshta paqes dhe stabilitetit. Por, duke e parë gjithmonë se çka do të prodhojë marrëveshja Kosovë – Serbi”, tha ai.
Kohë pas kohe çështja e bashkimit kombëtar ka ditur të aktivizohet si këndej edhe andej kufirit.
Kronika e realizuar nga Valmir Gallopeni
