Policia në orët e hershme të mëngjesit, në bashkëpunim me organet e tjera të drejtësisë ka filluar një operacion.
Aksioni është duke u zhvilluar në disa rajone.
“Sot, në orët e hershme të mëngjesit Policia e Kosovës në bashkëpunim dhe koordinim me organet e drejtësisë, ka filluar realizimin e një operacioni policorë, i cili përfshinë disa lokacione në katër rajone, Ptishtinë, Ferizaj, Mitrovicë Jugu dhe Gjilan”, ka thënë për teve1.info Baki Kelani, zëdhënës i policisë.
Sipsa Kelanit aksioni ka të bëjë me luftën kundër dukurisë së fajdeve.
“Operacioni policor ka të bëjë me hetimet dhe luftën kundër fenomenit të fajdeve, ku për informacione dhe detaje shtesë do të njoftoheni pas përfundimit të operacionit policor”, ka shtuar ai.
Aksionin e Policisë për veprat penale “Fajdeja”, “Detyrimi” dhe “Shmangia nga tatimi” e ka konfirmuar Prokuroria Themelore në Ferizaj.
Sipas Prokurorisë, aksioni ka të bëjë me rastin “Brezovica” derisa është shtrirë në Prishtinë, Ferizaj, Vushtrri dhe Lipjan.
“Prokuroria Themelore në Ferizaj, njofton opinionin publik se në bashkëpunim me Policinë e Kosovës, Drejtorinë për Hetimin e Krimeve të Rënda (DHKR) në Prishtinë, Administratën Tatimore të Kosovës (ATK) dhe Doganën e Kosovës, në bazë të urdhëresës së lëshuar nga Gjykata Themelore në Ferizaj për lëshimin e urdhëresës për kontroll dhe sekuestrim te përkohshëm të shtëpive, lokaleve përcjellëse dhe auto salloneve, sot, është duke e realizuar një aksion i cili ka rrjedh në kuadër të hetimeve lidhur me rastin “Brezovica”, ku, me ç’rast gjatë këtij aksioni, janë kontrolluar dhe bastisur disa autosallone, shtëpi dhe lokale përcjellëse në lokacione të ndryshme, konkretisht në qytetin e Prishtinës, Ferizajt, Vushtrrisë dhe Lipjanit, për shkak të dyshimit të veprave penale “Fajdeja” nga neni 331 par.3 lidhur me par. 1 të Kodit Penal të Republikës së Kosovës, “Shmangia nga tatimi” nga neni 307 par.1 lidhur me par 3 të KPRK-së dhe “Detyrimi” nga neni 328 par.2 të KPRK-së”,thuhet në njoftimin e Prokurorisë.
