Lubonja në emisionin “Info Nata” në Tëvë 1, u shpreh kundër një nisme të tillë pasi vlerëson se e pengon integrimin në Bashkimin Evropian, duke krijuar kështu një “Evropë të vogël”.
Megjithëse thotë se me këtë nismë ka interes ekonomia e vendeve ballkanike, sipas tij, “nuk mjafton ekonomia të futesh në Evropë”.
“Ideja është këtu që ne duam të futemi në Evropë për këtë proces që është një lloj ndihme që na jepet, por duke ndihmuar së pari vetveten ndërsa kjo që krijon Rama me Vuçiqin, dy liderë autoritarë që krijojnë në Ballkan gjoja vetëm për zgjidhjen e problemeve ekonomike pa u parë standardet demokratike, nuk janë e njëjta gjë. Pra sigurisht unë e kuptoj që ekonomia ka rëndësi, por nuk mjafton ekonomia të futesh në Evropë dhe ta shesësh këtë që po bën këtu si diçka që po bëjmë një Evropë të vogël, jo absolutisht problemi të bësh një Evropë të vogël është të realizosh standarde”, tha ai.
Ndërkaq, sa i përket anëtarësimit të Kosovës në këtë nismë, Lubonja shton se vendi duhet të hyjë në një proces evropian.
“Në këtë aspekt, edhe Kosova ka interes nëse do të hyjë, të hyjë në proces evropian me gjithë rezerva që kemi për Evropën, dhe jo në këtë strukturë paralele se Rama e ka zakon që krijon gjithmonë struktura paralele. Pse i duhet një strukturë e tillë kur kishte procesin e Berlinit dhe punonte më mirë atje bashkë me ndihmën evropiane? I duhet pikërisht për t’i shpëtuar këtyre problemeve tjera që i ngre një integrim brenda një kontrolli”, shtoi ai.
Po ashtu, publicisti theksoi se kjo iniciativë ka të bëjë me ambicie personale të liderëve ballkanik dhe jo me ndonjë vizion, siç është deklaruar.
“Kështu që është e qartë që ka të bëjë me ambicie personale të liderëve dhe jo me një vizion, Rama bën shumë edhe në Shqipëri në vend se të forcojë shtetin bën struktura paralele kur duhet për të kapërcyer një situatë, qoftë për propagandë”, shtoi ai. /teve1.info/