Zëvendës-komandanti i zjarrfikësve në Ferizaj, Jeton Avdiu ka deklaruar se zjarri është lokalizuar në hotelin “Pine” në Brezovicë.
Avdiu ka thënë për tëvë1 se janë në përkujdesje të objekteve të tjera përreth, pasi që siç deklaroi ai mund të ketë shembje të ndërtesës ngase është djegur tërësisht hoteli.
Madje, ai tha se nuk dihen ende shkaqet e këtij zjarri.
“Sot rreth orës 10:30 policia na ka njoftuar për një zjarr në Brezovicë, ku na ka treguar se është duke u djegur një restaurant, pasi që kemi marrë lajmin zjarrfikësit janë nisur me një automjet cisternë me 12 mijë litra ujë kanë mbërritur në vendin e ngjarjes dhe ka ndihmuar zjarrfikësit që janë këtu për ta ndihmuar për ta shuar zjarrin, për momentin zjarri është lokalizuar dhe po presim se ka mundësi me u shemb ndërtesa për arsye se është djegur tërësisht pothuajse dhe po rrimë në gjendje gatishmërie për t`i shpëtuar objektet e tjera që janë përreth. Shkaku nuk i dihet ende”, ka deklaruar zëvendëskomandanti.
Ndryshe, Në mëngjesin e sotëm është përfshirë nga zjarri një hotel në Brezovicë.
Lajmin për tëvë1.info e ka konfirmuar zëdhënësi i policisë për rajonin e Ferizajt, Kanun Veseli i cili ka thënë se aktualisht nuk ka raportime për të lënduar, kurse dëmet materiale janë të konsiderueshme.
Tutje, ai tha se zjarrfikësit po punojnë për të lokalizuar dhe shuar zjarrin.
“Sot rreth orës 10:15 kemi pranuar një informatë për një zjarr ku është përfshirë një restorant/hotel në Brezovicë. Ekipet e zjarrfikësve dhe policia kanë arritur menjëherë në vendin e ngjarjes. Zjarrfikësit po punojnë për të lokalizuar dhe shuar zjarrin, ndërsa policia po bënë sigurimin e zonës përreth. Aktualisht, nuk ka raportime për të lënduar, ndërsa dëmet materiale janë të konsiderueshme. Në vendin e ngjarjes kanë dalë edhe hetuesit për të përcaktuar shkaqet e zjarrit. Për çdo informacion shtesë, do të bëjmë njoftime në vijim”, ka deklaruar Veseli./teve1info/
