Kryetari i Sindikatës së Re të KEK-ut, Nexhat Lluminca, ka bërë të ditur se nesër punëtorët e kësaj kompanie do do të dalin në protestë në shenjë pakënaqësie me pagat.
Lluminca ka thënë se veprimet sindikale vijnë si pasojë e mosrealizimit të kërkesave për rritjen e pagave të punëtorëve.
“Ne kemi bërë kërkesë nga prilli i vitit të kaluar dhe asnjëherë nuk kemi marrë përgjigjeje pozitive në këtë drejtim. Madje, në takimin e fundit që ishim me drejtorin menaxhues në dhjetor të vitit të kaluar, ai ka thënë se nuk do të ketë rritje të pagave. Ne kërkuam shumë herë nga Bordi takime parreshtur, nuk patëm mirëkuptim dhe rruga e vetme mbetet protesta, e që besa mund të jetë edhe greva”, ka thënë ai në emisionin “Ditari” në Tëvë1.
Llumnica ka thënë se në qoftë se nesër nga protesta nuk ka rezultate pozitive, pas datës 3 prill ai ka paralajmëruar edhe grevë.
“Nëse nesër nuk ka rezultate pozitive dhe deri më 3 prill nuk shohim që ka ngritje të pagave, atëherë ne me Këshillin Drejtues do të vendosim për greva dhe forma të tjera sindikale që i lejon ligji”, tregoi ai.
Llumnica ka folur edhe për rrezikshmërinë në vendin e punës, ku ka njoftuar se gjatë vitit 2021, 35 persona kanë humbur jetën, që sipas tij janë si rezultat i sëmundjeve profesionale.
“Vetëm në vitin 2021 kemi pasur 35 raste të vdekjeve të punëtorëve, që ne dyshojmë se janë prej sëmundjeve që i marrin gjatë procesit të punës, ndërsa ne kemi rrezik të madh, por rrezikshmëria nuk paguhet. Ne kërkojmë ngritje të pagave, sepse në tërë Kosovën është ngritur paga”, tha Llumnica.
Tutje, ai ka thënë se si pasojë e mungesës së punëtorëve në vend shumica e punëtorëve aty punojnë 16 orë në ditë.
“Ndodh që shumë shpesh që punëtorët të punojnë me 16 orë në ditë, sepse ka mungesë të madhe të punëtorëve, mirëpo shumica e punëtorëve që punojnë në ndërrim të parë kanë nga dy-tre vende të punës që janë shumë të ngarkuar dhe mund të kenë lëndime”, ka thënë ai.
