Zbulohet pllaka në odën ku u mjekuan dhe u ushqyen ish ushtarët e UÇK-së
Në fshatin Llaushë të Skënderajt u zbuluan dy pllaka përkujtimore për të nderuar angazhimin kolektiv për lirinë e atdheut. Një në objektin që shërbente si strehë, e tjetra në vendin që shërbente si kuzhinë për ushtarët e Ushtrisë Çlirimtare të Kosovës.
Pragun e kësaj ode e kaluan shumë ushtarë.
Edhe hapësira brenda saj u la shumë herë me gjak.
Është kjo oda e familjes Geci në Llaushë të Skënderajt, ku mjekim gjetën shumë ushtarë të plagosur të Ushtrisë Çlirimtare të Kosovës.
Pamjet e 26 viteve më parë janë ende të freskëta në kokën e pronarit të kësaj ode, Halil Geci.
“Kjo shtëpi ka qenë strehim i UÇK-së, si strehim i armatimit të ushtarëve të UÇK-së, si objekt ku janë shëru të plagosurit gjatë luftës së UÇK-së”, tha Halil Geci.
Ky shërbim që kryhej në këtë objekt ra në sytë e forcave serbe.
“Kjo është djeg dy herë gjatë luftës, është djeg por është rindërtua dhe prapë ka vazhdu me qenë si bazë e UÇK-së deri në fund të luftës”, tregoi Geci.
Për këtë, të martën e 28 nëntorit u vendos kjo pllakë përkujtimore që jetësoi pikën e Batalionit të parë të Brigadës 112 ‘’Arben Haliti’’.
E jo larg nga këtu, ani pse kohë lufte, në lagjen Lani një oxhak po tymonte pandërprerë.
Ishin gratë e familjes Lani që vazhdimisht përgatisnin ushqimin për refugjatët dhe ushtarët e UÇK-së.
Njëra nga to, ishte edhe Elfije Lani.
“Na erdh urdhëri me dalë edhe prej shpie, m’çoi Zoti shtina kuleç, secili ëë ka dalë ia kam shti ka një kulaç n’xhep”, u shpreh Elfije Lani.
Pavarësisht rrezikut, sofra e familjes Lani gjatë luftës nuk u la asnjëherë bosh.
“Këtu janë ushqye krejt brigada 112 Arben Haliti, tani jemi dalë nëpër pikat ku i kanë pasë detyrat e tyre. Prej mina hedhësit njëherë jemi kanë të rrezikum se kanë gjujtë forcat serbe se e kanë ditë që është kuzhina këtu, por për fat të mirë s’kanë mujtë me na qëllue”, tha Qerim Lani.
Por në këtë vend, Faton Lani kujton edhe momente të vështira.
“Bukën kur e kem marrë këtu ka ëenë e mykur, për mos me ditë popullata çka është, e ka ditë baba jem Islami, edhe Xhaviti, nuk e kanë ditë që është buka e myktë, edhe ka marrë baba jem e ka hangër bukën edhe kem prit derisa me prit qysh po ndikon te ai, edhe bukën ia kemi dhanë popullatës pastaj natën për mos me pa që është buka e myktë”, tregoi Faton Lani.
Edhe në këtë lagje u zbulua pllakata në nder të angazhimit kolektiv në Llaushë për lirinë e atdheut.
